«Áziret Sultan» meshitiniń ımamy shetelge oqýǵa attandy (FOTO)
Elorda halqynyń rýhanı ordasyna aınalǵan respýblıkalyq «Áziret Sultan» meshitiniń ashylǵanyna bıyl jeti jyldyń júzi bolǵan eken. Kelbeti kóz toıdyrǵan qulshylyq ordasy osy ýaqyt ishinde kóptegen ıgi bastamalarǵa muryndyq bolyp, bilim men ǵylymnyń biregeı ordasyna aınalyp úlgerdi. Elimizdiń túkpir-túkpirinen aǵylǵan jamaǵat pen alys-jaqyn shetelderden astanamyzǵa at basyn tiregen qonaqtardyń da alyp qulshylyq ordasyna soqpaı ketetini kemde-kem. Búginde jyl saıyn 600-den astam shákirt tárbıelep, qanshama muqtaj janǵa kómek qolyn sozǵan qaıyrymdylyq ordasynyń ataq-abyroıynyń asqaqtaı túsýine meshit basshylyǵy men ujymynyń eńbegi eresen ekeni sózsiz. Osy oraıda meshit ımamdarynyń únemi óz bilimderin tolyqtyryp, qosymsha kýrstar men semınarlardy qur jibermeıtinin aıta ketken jón.
Búgin, osyndaı maqsatpen Túrkııa memleketindegi Ankara ýnıversıtetiniń doktorantýrasyna qujat tapsyrǵan «Áziret Sultan» meshitiniń naıb ımamy Qýat Erǵalıulyn shyǵaryp salý rásimi ótti. Juma namazyna jıylǵan jamaǵat aldynda QMDB tóraǵasynyń birinshi orynbasary, naıb múftı Naýryzbaı qajy Taǵanuly meshit ujymy men jamaǵaty atynan alǵys bildirip, qazaqy dástúrge saı ıyǵyna shapan japty. Birneshe jyl boıy «Áziret Sultan» meshitiniń birinshi naıb ımam qyzmetin jemisti atqaryp kelgen Qýat Erǵalıulynyń eńbegin el aldynda pash etip, bilim jolyndaǵy saparyna sáttilik tiledi.
Bilikti mamannyń bilim jolyna attanǵan saparyna oraı Nur-Sultan qalasy ákimdigi de sát sapar tilep, osy kezge deıin atqarǵan qyzmetin joǵary baǵalap, arnaıy «Alǵys hat» tabystady. Jumaǵa jıylǵan jamaǵat aldynda ákimdik «Alǵys hatyn» Nur-Sultan qalasy Din isteri basqarmasynyń bólim bastyǵy Nurdáýlet Álmuqan oqyp berip, quttyqtaý lebizin bildirdi.
Sýretterdi «FOTOGALEREIa» aıdarynan kóre alasyzdar!
