«Áziret sultan» meshitindegi jazǵy saýat ashý kýrsyna 400 bala qabyldandy (FOTO+VIDEO)

Búgin Nur-Sultan qalasyndaǵy respýblıkalyq «Áziret Sultan» meshitinde «Imanı jaz» jazǵy saýat ashý kýrsy óz jumysyn bastady. 8 men 15 jas aralyǵyndaǵy 400 oqýshy endi úsh apta boıy elimizdiń Bas meshitinde dinı saýat jetildirip, jazǵy demalystaryn paıdaly ótkizetin bolady. Osy oraıda meshit ustazdarynyń májilisinde bekitilgen oqý josparyna sáıkes ótkiziletin Quran álippesi men Imandylyq álippesi, Ádep jáne Duǵa sabaqtary búldirshinderdiń bilim alyp qana qoımaı, tárbıe men ádeptilikti boıyna sińirip shyǵýyna septigin tıgizetin bolmaq.

«Imanı jaz» dep atalatyn bul ıgi sharanyń bastalýyna oraı búgin arnaıy ashylý saltanaty bolyp ótti. QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanuly quttyqtaý lebizin bildirip, búldirshinderge sáttilik tiledi. Sondaı-aq, jazǵy saýat ashý kýrsynyń baǵdarlamasyna sáıkes arnaıy ázirlengen oqýlyqtar jaıly aqparat berip, ata-analar men oqýshylarǵa bıylǵy «Imanı jaz» kýrsynyń erekshelikteri jaıly túsindirip ótti.

Meshitke kelýshi jamaǵat ata-analardyń ótinishi boıynsha iske qosylǵan «Imanı jaz» jazǵy saýat ashý kýrsynyń jemisti jumys jasap kele jatqanyna bıyl birneshe jyldyń júzi bolǵan. Búginde elimizdegi barlyq iri meshitterde jalǵasyn tapqan ıgi sharanyń jyl sanap aýqymy keńeıip jatqany kóńil qýantady. Respýblıkalyq Bas meshittegi bıylǵy jazǵy saýat ashý kýrsyna qabyldanǵan baldyrǵandar sany da byltyrǵydan arta túsip, 400-ge jetip otyr.

Aıta keteıik, «Imanı jaz» kýrsy aıasynda baldyrǵandar úshin túrli bilim jarystary uıymdastyrylyp, shahardaǵy mádenı oryndarǵa saıahat jasalatyn bolmaq.

Sýretterdi «FOTOGALEREIa» aıdarynan kóre alasyzdar!