«Áziret Sultan» meshitindegi tigin úıirmesiniń túlekterine sertıfıkat tabystaldy (FOTO+VIDEO)

Búgin Nur-Sultan qalasyndaǵy respýblıkalyq «Áziret Sultan» meshitinde taǵy qýanyshty shara bolyp ótti. Osydan eki aı buryn ashylǵan «Altyn ıne» tegin tigin úıirmesiniń búgin alǵashqy túlekteri oqý kýrsyn támamdap, arnaıy sertıfıkatqa ıe boldy.

Esterińizge sala keteıik, qasıetti Ramazan aıynyń qarsańynda Nur-Sultan qalasynyń bas ımamy Naýryzbaı qajy Taǵanulynyń bastamasymen «Áziret Sultan» meshitinde jamaǵatqa arnalǵan tegin tigin kýrsy ashylǵan bolatyn. Shákirtterdi tigin óneriniń syryna qanyqtyryp, sheberlikke shynyqtyrǵan úıirme jetekshisi Rahmetova Saltanat osy ýaqyt ishinde 35 qyz-kelinshektiń «Áıeldiń bazalyq kıimderin pishý jáne qurastyrý tehnologııasy» boıynsha oqý baǵdarlamasyn tolyǵymen támamdaǵanyn aıtady. Úıirme shákirtteri arasynda jasy jer ortadan asqan apalardan bastap, oqýshy qyzdar da bar kórinedi.

Saltanatty sharaǵa arnaıy qatysqan QMDB tóraǵasynyń birinshi orynbasary, naıb múftı Naýryzbaı qajy Taǵanuly úıirme shákirtterin búgingi qýanyshtarymen quttyqtady. Asyl dinimizdiń áıel zatyna degen aıryqsha qurmetimen qatar, mindeti de bar ekenin tilge tıek etken naıb múftı tiginshilik ónerin meńgerip, boıyna jaqsy qasıetterdi jınaýǵa tyrysqan jamaǵatqa óz rızashylyǵyn bildirdi. Aldaǵy ýaqytta meshit ustazdarynyń atsalysýymen taǵy basqa da úıirmeler ashý  josparlanyp otyrǵanyn jetkizdi.

Shara aıasynda «Áziret Sultan» meshiniń ustazy Dınara Nurǵalıeva da úıirme shákirtterine quttyqtaýyn lebizin bildirip, jańa oqý jylyndaǵy josparlarymen bólisti. Meshittiń áıel jamaǵaty úshin jasalatyn túrli sharalar men kezdesýler, ýaǵyz-nasıhat jumystary men dinı dáristerden bólek, arnaıy semınar-trenıngter men úıirmeler jumysy da jalǵasatynyn jetkizdi.

Shara sońynda úıirme shákirtteri merekelik dastarhanǵa jaıǵasyp, aıtýly oqıǵaǵa oraı ázirlengen «Altyn ıne» tortynan dám tatty.

Sýretterdi «FOTOGALEREIa» aıdarynan kóre alasyzdar!