«Áziret Sultan» meshitinde Tatýlasý ortalyǵy ashyldy (FOTO+VIDEO)

Respýblıkalyq «Áziret Sultan» meshitinde búgin taǵy bir ıgilikti jobanyń tusaýy kesildi. QMDB tóraǵasynyń birinshi orynbasary, naıb múftı Naýryzbaı qajy Taǵanulynyń bastamasy negizinde Nur-Sultan qalalyq soty men Bas meshit arasynda ózara memorandým jasalyp, taraptar azamattyq daý-janjaldardy sheshý jolynda birige jumys atqaratyn boldy.

Elordamyzda jaqynda ǵana ashylǵan «Tatýlas ortalyǵynda» ótken basqosý barysynda Nur-Sultan qalalyq sotynyń azamattyq ister jónindegi sot alqasynyń tóraǵasy Qýanyshbaı Áljikov pen «Áziret Sultan» meshitiniń birinshi naıb ımamy Marat Bektazınov memorandýmǵa qol qoıyp, jumys barysyn talqylady. Yntymaqtastyq memorandýmy aıasynda respýblıkalyq «Áziret Sultan» meshitiniń qyzmetkerleri sotqa deıingi tatýlastyrý áreketterine qoldaý kórsetip, januıa birligin saqtaýǵa úles qosatyn bolmaq.

Igi sharanyń jalǵasy retinde búgin «Áziret Sultan» meshitinde arnaıy Tatýlasý ortalyǵy ashylyp otyr. Bas meshittegi bilikti din mamandarynyń kezekshiligi negizinde tatýlasý ortalyǵynda januıalyq máseselerdiń túıini tarqatylyp, bitimge shaqyrý jumystary júrgiziletin bolmaq. Ashylý saltanatyna arnaıy qatysqan Bıler keńesi músheleri aq batalaryn berip, tilektestik bildirdi.

Aıta keteıik, Bas meshittegi Tatýlasý ortalyǵy ashyla salysymen-aq, sharıǵı keńes suraǵan jandardyń kezegi bastalyp ta ketti. Otbasylyq jaǵdaıdy jóndeýge tyrysqan jubaılar úshin ımam nasıhatynyń orny bólek ekeni sózsiz.

Sýretterdi «FOTOGALEREIa» aıdarynan kóre alasyzdar!