«Áziret Sultan» meshitinde qyzmettik aýys-túıister oryn aldy (FOTO)
Búgin, qasıetti juma kúni Nur-Sultan qalasyndaǵy respýblıkalyq «Áziret Sultan» meshitinde birqatar qyzmettik taǵaıyndaýlar oryn aldy. Esterińizde bolsa, ótken jumada «Áziret Sultan» meshitiniń naıb ımamdary Ǵazız Ahmet pen Nurlan Ramazanovtyń basqa qyzmetke aýysqandyǵy jaıly habarlaǵan bolatynbyz. Elimizdiń Bas meshitinde birneshe jyl boıy jemisti eńbek atqaryp kelgen qos ımammen búgin arnaıy qoshtasý rásimi ótkizilip, jamaǵat aldynda qurmet kórsetildi.
Aıta keteıik, QMDB tóraǵasy, Bas múftı Serikbaı qajy Orazdyń buıryǵy boıynsha Ǵazız Ahmet Taraz qalasynyń Bas ımamy qyzmetine taǵaıyndalsa, Nurlan Ramazanov Nur-Sultan qalasyndaǵy «Sádýaqas Ǵylmanı» meshitiniń Bas ımamy qyzmetine kiristi. Jamaǵatqa qos birdeı taǵaıyndaý buıryǵyn respýblıkalyq «Áziret Sultan» meshitiniń birinshi naıb ımamy Qanat Qydyrmın tanystyryp ótip, ımamdarǵa jańa qyzmetterine sáttilik tiledi. Jamaǵat atynan arnaıy alǵys bildirip, qazaqy dástúrimizge oraı ıyqtaryna shapan jaýyp shyǵaryp saldy. Qazirgi tańda Máskeý qalasynda ótip jatqan Halyqaralyq konferentsııaǵa attanǵan QMDB tóraǵasynyń birinshi orynbasary, naıb múftı, Nur-Sultan qalasynyń ókili jáne «Áziret Sultan» meshitiniń Bas ımamy Naýryzbaı qajy Taǵanulynyń sálemin jetkizip, aq jol tiledi.
Sondaı-aq, Bas múftı buıryǵymen respýblıkalyq «Áziret Sultan» meshitiniń naıb ımamy qyzmetine taǵaıyndalǵan Sadyrhanov Jumanazar Óserhanulyn jamaǵatqa tanystyryp ótti. Táýelsiz elimizdiń alǵashqy ári ataqty qarılarynyń biri Jumanazar Óserhanulynyń esimi men eńbegi, qabileti men qyzmeti Elorda jamaǵatyna keńinen tanys. Bilikti mamannyń Bas meshittegi qyzmetine sáttilik tilep, abyroıy arta berýine tilektestigin jetkizdi.
Aıta keteıik, Jumanazar Óserhanuly qasıetti Quran kárimdi 16 jasynda jattap, Túrkııanyń Stambýl qalasyndaǵy «Ýmranıe A.M. Hýdaııe» qoryna qarasty medresede oqyp júrgen shaǵynda qarı ataǵyna qol jetkizgen.
1997 jyly elge oralǵan ol Almatydaǵy Islam ınstıtýtynda úsh jyl bilim jetildirip, Almaty Ortalyq meshitiniń naıb ımamy qyzmetine ornalasady. 11 jyl boıy osy meshitte jemisti eńbek etip kelgen ol «Amanqul ata» medresesinde qosymsha ustazdyq atqaryp, 10-nan astam hafız tárbıelep shyǵarǵan.
Úndistan, Malaızııa, Lıvııa jáne Qyrǵyzstandaǵy Quran hatym jarystarynda, Orta Azııa boıynsha eki ret 2 - orynǵa ıe bolǵan. Qazaqstandaǵy Qarılar komıssııasynyń múshesi.
