«ÁZIRET SULTAN» MEShITINDE QADIR TÚNI QARILARǴA QURMET KÓRSETILDI

Myń aıdan da qaıyrly Qadir túnine arnalǵan rýhanı baǵdarlama aıasynda «Áziret Sultan» meshitinde Ramazan aıy boıy taraýyq namazyn júrgizip, jamaǵatqa Quran aıattaryn áýezdi maqammen oqyp bergen qarılarǵa qurmet kórsetildi.

Astana qalasynyń jáne «Áziret Sultan» meshitiniń bas ımamy Erbolat Júsipov qasıetti aıda qulshylyqty kórkeıtip, jamaǵattyń rýhanı sýsyndaýyna úles qosqan qarılarǵa alǵys aıtyp, arnaıy marapat tabystady. Dástúrge saı ıyqtaryna shapan jabylyp, olardyń ıgi qyzmetine bereke tilep, duǵa jasaldy.

Sondaı-aq meshitke jınalǵan aqsaqaldar men jamaǵat ókilderi qarılarǵa batasyn berip, rızashylyqtaryn bildirdi. Qasıetti aıda Quranmen qaýyshtyrǵan qarılar kópshiliktiń ystyq yqylasyna bólendi.

Jamaǵatty namazǵa uıytyp, Quran Kárimniń qasıetti aıattarymen sýsyndatqan qarılarymyz týraly málimet bere keteıik.

1. Jumanazar Sadyrhanov
1979 jyly 23 qarashada týǵan.
Astana qalasy ókildigi «Áziret Sultan» meshitiniń naıb-ımamy.
Asyl qyraǵatynan «Hafs» jáne «Shýǵba» rıýaıattary boıynsha eki ıjazaǵa ıe.
QMDB janyndaǵy «Qarılar alqasynyń» múshesi.
Elimizdiń alǵashqy qarılarynyń biri, qazirgi kóptegen qarılardyń ustazy.
20 jyldan astam ýaqyttan beri Ramazan aıynyń Taraýıh namazdarynda Quran hatym etip kele jatqan tájirıbeli qarı.

2. Alıhan Berden
2003 jyly 4 shildede týǵan.
Stambul qalasynda ornalasqan «29 Maıys» ýnıversıtetiniń «Islamtaný» fakýltetiniń 3-kýrs stýdenti.
2024 jyly Batys Qazaqstan oblysynda ótken Respýblıkalyq Quran jarysynyń irikteý kezeńinde 1-oryn júldegeri.
2020 jyldan beri Taraýıh namazynda Quran hatym etip keledi.

3. Nurmuhammed Aıýbaı
2006 jyly 12 qyrkúıekte týǵan.
Astana medrese-kolledjiniń 3-kýrs stýdenti.
2019 jyly Qyzylorda qalasynda ótken Respýblıkalyq Quran jarysynda «Kórermen kózaıymy» nomınatsııasynyń ıegeri atandy.
2020 jyldan beri Taraýıh namazynda Quran hatym etip keledi.