«Áziret Sultan» meshitinde Oraza aıt merekesi bastaldy (FOTO+VIDEO)

15 maýsym 2018 8079 0
Оqý rejımi


Búgin Astana qalasyndaǵy respýblıkalyq «Áziret Sultan» meshitinde aıt namazy oqylyp, meshit aýlasynda birqatar merekelik sharalar uıymdastyryldy. Tań atysymen qulshylyq ordasyna qaraı aǵylǵan jamaǵat saǵat tili altyny kórsetpeı jatyp-aq qulshylyq ordasynyń ishin lyq toltyrdy. Aýmaǵy atshaptyrym alyp meshittiń ishi-syrty túgeldeı jamaǵatqa tolyp, Oraza aıt namazy bastalǵansha ǵıbadat-qulshylyq pen duǵa-tilekterdiń legi tolastamady.

Aıt namazynyń aldynda meshit minberine QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanuly kóterilip, ulyq merekeniń qadir-qasıeti men mán-mańyzy jaıynda qysqasha ýaǵyz aıtyp ótti. Budan keıin elimizdiń bas múftıi Serikbaı qajy Oraz Bas meshit jamaǵatyn Oraza aıt meıramymen quttyqtap, aıt namazyna ımamdyqqa shyqty. Jamaǵatqa aıt namazynyń qutpasyn jetkizip, ulyq merekeniń bastaýyn jamaǵatpen jasalǵan duǵamen árledi.

Respýblıkalyq «Áziret Sultan» meshiti jyldaǵy dástúr boıynsha bıylǵy Oraza aıt merekesin de ulttyq naqyshta, merekelik kóńil-kúıde ótkizdi. Meshit aýlasynda arnaıy kıiz úıler tigilip, aıtshylap kelgen jamaǵatqa aq dastarhan jaıyldy. Sondaı-aq, «Áziret Sultan» meshitiniń áıel ustazdary men jamaǵatynyń bastamasymen uıymdastyrylǵan «Qaıyrymdylyq jármeńkesi» de búgingi kúnniń mańyzyn arttyra tústi.

Buǵan qosa, ulttyq sport túrlerin ulyqtaý maqsatynda meshit jamaǵaty arasynda arqan tartys, gir kóterý, qol kúresinen saıystar uıymdastyrylyp, meshit aýlasyndaǵy mereke kórigin qyzdyra tústi. «Áziret Sultan» meshiti atynan saıys júldegerleriniń barlyǵyna arnaıy «Alǵys hat» tabystalyp, aqshalaı syılyqpen marapattaldy.

Pіkіrler Kіrý