«Áziret Sultan» meshitinde Máýlit oqyldy (FOTO+VIDEO)

Búgin, qasıetti juma kúni respýblıkalyq «Áziret Sultan» meshitinde Máýlit merekesi atalyp ótti. Kúnderdiń sultany bolǵan jumadaǵy Máýlit merekesi jamaǵatty Paıǵambarymyzdyń (s.ǵ.s.) súıikti jemisi – qurmamen qarsy alyp, saýapqa toly qalta qaǵazdaryn syılaýmen bastaldy. Saýapqa toly deıtin sebebimiz – jamaǵatqa jappaı úlestirilgen bul qalta qaǵazdarynda ardaqty Alla Elshisine degen salaýat mátini jazylǵan.

Qasıetti Quran Kárimde Alla Taǵala: «Rasynda, Alla jáne perishteler Paıǵambarǵa salaýat aıtady. Áı, múminder! Oǵan salaýat jáne yqylaspen sálem keltirińder», – dep buıyrady. Al, Alla Elshisiniń (s.ǵ.s.) ózi: «Qııamette maǵan eń jaqyn adam – maǵan kóp salaýat aıtqan adam», – degen eken.

Jumaǵa jıylǵan jamaǵatqa Birinshi naıb múftı, «Áziret Sultan» meshitiniń bas ımamy Naýryzbaı qajy Taǵanuly ardaqty Paıǵambarymyz týylǵan máýlit aıynyń qadir-qasıetin aıtyp ótip, máýlit jyrynyń mańyzyna toqtaldy. Budan soń Bas meshit qyzmetkerleri, qos qarı Jumanazar Sadyrhanov pen Erlan Bazarbaıulymen birge Máýlit jyryn oqyp, súıikti Paıǵambarymyzǵa (s.ǵ.s.) sansyz salaýattar joldandy.

Alyp meshittiń ishin múminderdiń rııasyz aıtqan salaýattary men Paıǵambarymyzǵa (s.ǵ.s.) degen súıispenshiligi toltyryp, Máýlit merekesiniń shýaǵy jaıyla tústi. Jamaǵatpen birge jasalǵan duǵa da elimiz ben jerimizdiń amandyǵyn surap, Paıǵambarymyzdyń (s.ǵ.s.) shapaǵaty násip bolýyn tileýmen aıaqtaldy.

Sýretterdi «FOTOGALEREIa» aıdarynan kóre alasyzdar!