«Áziret Sultan» meshiti 250 oqýshyny mektepke daıyndady (FOTO+VIDEO)

QMDB Nur-Sultan ókildigi boıynsha bastalǵan «Mektepke jol» qaıyrymdylyq aktsııasy búgin respýblıkalyq «Áziret Sultan» meshitinde jalǵasyn tapty. Meshit qyzmetkerleriniń jumyla uıymdastyrýymen demeýshi jandardyń qoldaýy arqasynda Bas meshittegi «Mektepke jol» qaıyrymdylyq aktsııasy bıylǵy jyly Elordamyzdaǵy 250 muqtaj otbasyny qamtydy.

Atalmysh aktsııa Nur-Sultan qalasynda ótken aptanyń juma kúninde bastalǵan bolatyn. Sodan beri Elordamyzdaǵy 11 meshit boıynsha kezekpen ótip kele jatqan qaıyrymdylyq sharasy qazirgi tańǵa deıin 800-den astam otbasyny qamtyp úlgerdi. Aıta keteıik, aktsııa jumystary 28-tamyzǵa deıin jalǵasatyn bolady.

Elimizdiń Bas meshitindegi qaıyrymdylyq sharasy qasıetti Quran aıattarymen ashylyp, QMDB tóraǵasynyń birinshi orynbasary, naıb múftı Naýryzbaı qajy Taǵanulynyń aq batasymen jalǵasty. Bilim jolyndaǵy búldirshinderge sáttilik tilep, izgi tilegin arnaǵan Nur-Sultan qalasynyń bas ımamy oqýshylarǵa mektep sómkesi men qarjylaı kómekti ózi qolymen tabystady.

Jyldan-jylǵa qaıyrymdylyq sharasynyń aýqymy keńeıip kele jatqanyn tilge tıek etken Naýryzbaı qajy Taǵanuly osy aktsııaǵa atsalysqan demeýshi jamaǵatqa da óz alǵysyn bildirip ótti. Asyl dinimizdiń bilim-ǵylymǵa degen aıryqsha qurmeti men yqylasy jaıly sóz qozǵaǵan naıb múftı bul qaıyrymdylyq sharasynyń bilimge jasalǵan qoldaý ekenin atap ótti.

Sýretterdi «FOTOGALEREIa» aıdarynan kóre alasyzdar!