«Áziret Sultan» ájeleri Orazaǵa arnap otyz Quran hatym túsirdi (FOTO)

Respýblıkalyq «Áziret Sultan» meshitindegi Dinı saýat ashý kýrsynyń áıel shákirtteri qasıetti Ramazan aıynyń qurmetine oraı orazanyń 30 kúnine arnap, Quran Kárimdi hatym etýdi bastaǵan bolatyn. Ulyq aı esigimizden enisimen hatym túsirýdi bastap 30 áje búgin Quran kárimdi tolyǵymen aıaqtap, Quran hatym duǵasyn jasady.

Bir-bir áýlettiń uıytqysyna aınalǵan aqjaýlyqty ájelerimiz jastarynyń egdeligine qaramastan Bas meshittegi Dinı saýat ashý kýrsyna jazylyp, shákirt atanǵandaryna birneshe jyldyń júzi bolǵan. Meshit ustazy Beket Gúlsara apamyzdan saýat ashyp, bilim alyp júrgen shákirt ájelerimiz qulshylyq ordasyndaǵy Bilim saıystary men Quran jarystaryna da úzbeı qatysyp, bilim jolyndaǵy izdenisterin únemi damytýmen keledi. Gúlsara ustazdarynyń aıtýynsha, toptaǵy shákirt ájelerdiń bastamasymen qaıyrymdylyq sharalaryna úles qosýdy da qolǵa alypty.

Bas meshittegi búgingi berekeli otyrysqa Ramazannyń sońǵy onkúndigine oraı kishi qajylyqqa attanǵan apa-ájelerimizdiń qatysa almaı qalǵanyn eskertip ótken Gúlsara ustaz ol kisilermen habarlasyp, Quran hatym tolyq aıaqtalǵanyn atap ótti. Saltanattty sharaǵa arnaıy qatysqan QMDB tóraǵasynyń birinshi orynbasary, naıb múftı Naýryzbaı qajy Taǵanuly Quran hatym duǵasyn jasap, ardaqty ájelerimizben júzdesti. Qasıetti Quran kárimniń shapaǵaty jaıynda súıinshilep, úlken saýapty is atqarǵan ájelerge óz alǵysyn bildirdi.Meshit shákirtteri de Bas ımamǵa óz lebizderin jetkizip, aq batalaryn berdi.

Sýretterdi «FOTOGALEREIa» aıdarynan kóre alasyzdar!