AINALAMYZǴA ALǴYS AITA JÚREIIK, AǴAIYN
Asa qamqor, erekshe meıirimdi Allanyń atymen bastaımyn!
Allaǵa madaq, paıǵambarǵa salaýattar bolsyn!
Qadirli otandastar! Ardaqty aǵaıyn!
Halqymyz kóktemniń alǵashqy shýaqty kúninde ónegesi mol, máni erekshe merekeni atap ótedi. 1 naýryz – Alǵys aıtý kúninde elimizdegi túrli ult ókilderi qazaq halqyna aıryqsha alǵys aıtyp, qurmeti men izetin bildirip keledi.
Rasynda, taǵdyr taýqymetin tartyp, zobalań zamandarda qazaq jerine pana izdep kelgen túrli ult pen din ókilderi halqymyzdyń janashyrlyǵy men qamqorlyǵyna bólendi. Olar syndarly sátte qushaq jaıyp qarsy alyp, keńpeıil nıet tanytqan qazaq halqyna árqashan alǵysy men rııasyz rızashylyǵyn bildirýde.
Qazaq jerinde birneshe ult pen din ókilderiniń ómir súrýi – Allanyń qalaýy. Allanyń qalaýyna qatysty taǵdyrda tańdaý bolmaıdy. Endigi maqsat – ult bolyp uıysyp, bir shańyraq astynda tatýlyqty tý etip, ónegeli ómir sabaqtastyǵyn qalyptastyrý.
Biz eń áýeli adam balasyn joqtan bar etip jaratqan Jaratýshy Iemizge shúkir aıtamyz. Shynynda, Allanyń adam balasyna bergen nyǵmetiniń shegi joq. Árbir atqan tańdy amandyqpen qarsy alýdyń ózi baǵa jetpes nyǵmet emes pe? Ár kúnimizge shúkir deımiz.
Ekinshiden, bizdi ómirge ákelýge sebepshi bolǵan, sábı sátimizden mápelep, aıalap ósirgen ata-anamyzǵa alǵys aıtamyz. Osyndaıda halqymyzdyń «Ata – qorǵan, ana – qurban» degen júrek tebirenterlik qanatty sózi eske túsedi... Qorǵan bolǵan ákemizge, balasy atqa qonsa, taqymyn qysatyn anamyzǵa alǵys aıtý – perzenttik paryzymyz. Taǵdyr jazýymen ómirden ótken bolsa duǵa etip, týystary men zamandastaryna qamqorlyq jasaý – musylmandyq mindetimiz. Alla elshisi osyndaı amalǵa úndegen.
Úshinshiden, aınaladaǵy kisilerge alǵys aıtý – adamgershilik boryshymyz. Musylman balasy qandaı da ıgilik pen nyǵmetke bólense, áýeli Allaǵa shúkir aıtyp, sol jaqsylyqqa sebepshi bolǵan adamǵa alǵysyn bildiredi. Ardaqty paıǵambarymyz Muhammed (oǵan Allanyń salaýaty men sálemi bolsyn): «Adamǵa alǵys aıta almaǵan, Allaǵa shúkir ete almaıdy», – degen.
Adamdar arasyndaǵy meıirbandyq pen dostyq, tatýlyq pen qurmet syndy qundylyqtardy arttyra túsetin aıtýly kúnde aınalamyzǵa alǵys aıtyp, tileýlestigimizdi bildire júreıik, aǵaıyn! Sizderge myń alǵys! Barshańyzǵa Allanyń amandyǵy men bereketin tileımin! Elimiz aman, jurtymyz tynysh, táýelsizdigimiz baıandy bolǵaı! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
