Aýyl jastarynyń arqasynda bir otbasy baspanaly bolady (FOTO)

Túrkistan oblysy, Báıdibek aýdanyndaǵy Aqbastaý aýylynyń turǵyndary ıgi bastama kóterip, kóp balaly anaǵa arnalǵan qoldaýymen «Turmysy tómen bir otbasyǵa bir baspana» qaıyrymdylyq sharasyn bastap otyr. «Aqbastaý» meshitiniń ımamy N.Moljigittiń bastamasymen qolǵa alynǵan bul ıgi iske aýyl turǵyndary men qoǵamdyq uıymdar, jeke kásipkerler belsene atsalysyp, bes balanyń anasy M.Maralbaevaǵa úı salyp berýge sheshim qabyldanǵan.

Aýyl ákimi N.Súgirbaev jáne orynbasary A.Muratova salynyp jatkan úıdiń qujattaryn rásimdep berýdi moınyna alsa, aýyldyń týmasy jeke kásipker A.Qaıratuly, J.Yshaqov, N.Ońbergenovter qarjylaı qoldaý kórsetip, qurylys materaldarymen qamtamasyz etýge yqylas tanytqan. Qaıyrymdylyq sharasyna aýyldyń ardagarler ujymy, bıler alqasy, Ú.Álseıtov, Ǵ.Qabylbekov bastaǵan aýyl jastary da óz úlesterin qosýda. Qurylys barysyn qadaǵalap turý aýylymyzdyń abyz qarııasy S.Qulbekovke júktelip, qazirgi ýaqytta jańa baspana jartylaı aıaqtalyp ta qalǵan. Alla qalasa, kóp balaly otbasy tamyz aıynyń ortasynda jańa baspanalaryna kirip, qýanyshty qonys toıyn toılaıtyn bolmaq.

Meıirimdilikti mekenine aınalǵan Aqbastaý aýylynda bıylǵy jyly budan bólek turmysy tómen eki otbasyǵa eki buzaýly sıyr berilgen kórinedi. Jeke sharýashylyq tóraǵasy B.Dýlatov jylda turmysy tómen otbasylarǵa 40-bas ýak maldy zeket esebinen taratyp otyrsa, osy aýyldyń týmasy belgili aıtysker aqyn Aqmaral Leýbaeva turmysy tómen otbasy Ú.Álseıitovanyń úıiniń shatyryn jańartýǵa qarjylaı kómektesken.

Sondaı-aq, aýyl jastary aldaǵy jyldary turmysy tómen bir otbasyǵa bir baspana salyp berýdi josparlap otyr.