Atyraýlyq ımamdarǵa qyzmettik úıdiń kiltin tabystaldy (FOTO)

Búgin Atyraýda ımamdarǵa qyzmettik úı tapsyryldy. Baspana kiltin Qazaqstan musylmandary dinı basqarmasynyń Atyraý oblysy boıynsha ókili, ortalyq «Imanǵalı» meshitiniń bas ımamy Batyrjan Mansurov ımamdarǵa jamaǵat aldynda saltanatty jaǵdaıda tabys etti.

Eki birdeı úı osylaısha Atyraý qalasyna qarasty Juldyz eldimekenindegi Qajymuqan Muńaıtpasov atyndaǵy meshittiń ıgiligine berilip otyr. Saýapty iske atalmysh meshittiń jamaǵaty qarjy jınap, tikeleı atsalysty. Sonymen birge, shalǵaıda júrgen atyraýlyq azamattardyń da zor úlesi boldy. 

Kólemi 60 sharshy metr bolatyn qos úıdiń árqaısy úsh bólmeden turady. Zamanaýı úlgide turǵyzylǵan úıde turmysqa qajetti barlyq jaǵdaı jasalǵan. Qyzmettik úıde Qajymuqan Muńaıtpasov atyndaǵy meshittiń bas ımamy Ardaq Jumabekuly jáne atalmysh meshittiń naıb ımamy turatyn bolady.

«Buǵan deıin ımamdardyń jaǵdaıy kúrdeli bolyp kelgen edi. Kóp jaǵdaıda ımamdar páter jaldap júretin. Endi mine, Qajymuqan Muńaıtpasov atyndaǵy meshitimizdiń balansyna eki birdeı baspana berilip otyr»,- degen bas ımam Batyrjan Mansurov meshit jamaǵatyna alǵysyn jetkizdi.

Atap óter jaıt, ótken jyly Atyraý oblysynyń bas ımamy Batyrjan Mansurov Qurmanǵazy aýdanyndaǵy ortalyq Temiráli meshitiniń balansyna demeýshiler tarapynan berilgen úıdiń kiltin saltanatty jaǵdaıda tapsyrǵan bolatyn.