Atyraýda tatýlasý ortalyǵy ashyldy

Atyraý qalasynda tatýlasý ortalyǵy ashyldy, dep habarlaıdy QazAqparat.

«Jaqynda Azamattyq is júrgizý kodeksine ózgertýler men tolyqtyrýlar engizilgen bolatyn. Olardyń bir bólimi tatýlastyrý rásimderin júrgizýge baǵyttalǵan. 22 maýsymnan bastap sottar taraptardyń talap aryzdaryn qabyldap, olardy bitimge keltirýshi sýdıaǵa jiberedi. Taraptar problemalyq máselelerdi tatýlasý arqyly sheshýi úshin oǵan 14 kún ýaqyt beriledi», - dedi Atyraý oblystyq sotynyń tóraǵasy Baýyrjan Jumaǵulov.

Ortalyq jumysy ótken jyly oblystyq sottyń bazasynda pılottyq rejımde bastalǵan bolatyn. Osy ýaqyt ishinde 2257 is qaralyp, olardyń 840-y sotqa jetpeı sheshildi.

Ortalyqta azamattarǵa medıatorlar, bıler, qorǵaýshylar, prokýrorlar, psıhologtar, notarıýstar jáne bıznes-ombýdsmen ókilderi kómek kórsetedi. Ortalyq qajetti tehnıkalyq quraldarmen jabdyqtalǵan.