Atyraýda áıelder arasynda Quran jarysy ótti (FOTO)

QMDB Áıelder-qyzdar sektorynyń Atyraý oblysy boıynsha ókildiginiń uıymdastyrýymen Atyraýda Quran oqý jarysy ótti. Sharaǵa Atyraý oblysynyń Bas ımamy Altynbek Utyshanuly arnaıy qatysyp, qatysýshylarǵa sáttilik tiledi.

«Quran – adamzatty eki ómirdiń baqytyna jeteleıtin eń sońǵy ıláhı kitap. On tórt ǵasyrdan beri útir-núktesi de ózgermegen Alla Taǵalanyń ýahıi. «Hıjr» súresinde Alla Taǵala «Shyn máninde Biz zikirdi (Qurandy) túsirdik. Endi ony ózimiz saqtaımyz» deıdi. Al qazir biz bul ıláhı kitaptyń Alla ýáde etkendeı, san túrli joldarmen saqtalyp otyrǵanyn kózben kórip kelemiz. «Isra» súresinde Alla Taǵala: «Shyn máninde bul Quran eń týra jolǵa bastaıdy. Izgi amaldardy jasaǵan múminderdi úlken saýappen súıinshileıdi» dep, Qurannyń adam balasy úshin máni men mańyzyn aıtyp ótedi. Demek, Quran musylmandy eń durys, eń paıdaly, eń baqytty ómirge jeteleıdi. Quranmen ómir súrgen adamdy Alla Taǵala eki ómirde qor etpeıdi» dedi shara barysynda Atyraý oblysynyń Bas ımamy Altynbek Utyshanuly.

Quran jarysy eki kezeńnen turdy. Birinshi kezeńde qatysýshylar Qurannyń 30-parasy boıynsha synǵa tústi. Ekinshi kezeńde «Baqara» súresiniń alǵashqy 10 betinen kez kelgen aıatty oqyp, taldaý talaby qoıyldy. Saıys aıasynda Paıǵambarymyz (oǵan Allanyń salaýaty men sálemi bolsyn) týraly kórinister qoıylyp, ýaǵyz aıtyldy. Sonymen birge, úlgili shákirtterge syılyqtar tabys etildi.

Birneshe saǵatqa sozylǵan konkýrs aıasynda birinshi oryndy Anargúl Kenjeshova jeńip aldy. Oǵan 80 myń teńge qarjylaı syılyq tabys etildi. Ekinshi jáne úshinshi oryndardy Aqtilek Bekbolat (40 myń teńge) pen Aıarý Amangeldi (20 myń teńge) ózara bólisti. Barlyǵy on úmitker baq synasqan bilim báıgesi tartysty, ári mazmundy ótti.

Aıta ketý kerek, konkýrs aıasynda barlyq qatysýshylarǵa arnaıy sertıfıkattar men qasıetti Quran kitaby syıǵa tartyldy.

​