«ATALAR MEKTEBI» KLÝBYNYŃ MÚShELERIMEN TAǴYLYMDY BASQOSÝ ÓTTI

«Áziret Sultan» meshitiniń naıb ımamy Abdýlahad Smanov «Ál-Fáttah» meshitindegi «Atalar mektebi» klýbynyń múshelerimen kezdesti.

Jıynǵa «Ál-Fáttah» meshitiniń ımamy Baǵdat Abdýkarımov bastaǵan meshit qyzmetkerleri men aqsaqaldar qatysty.

Abdýlahad Smanov «Qudaıy as – jarys emes, saýap» jáne «Toı – tárbıe men taǵylymnyń ordasy» taqyryptarynda nasıhat aıtyp, qazaq halqynyń salt-dástúrindegi as berý men toı ótkizýdiń mán-mańyzyna toqtaldy. Sonymen qatar qatysýshylarǵa as berý mádenıetine qatysty arnaıy qujat tanystyrylyp, onyń negizgi baǵyttary túsindirildi.

Basqosýda as berý kezinde ysyrapshyldyqqa jol bermeý, qarapaıymdylyqty saqtaý jáne rásimniń negizgi maqsaty marqumdy eske alyp, duǵa jasaý ekenin uǵyndyrý máseleleri qozǵaldy. Sondaı-aq toı-tomalaqtyń tárbıelik mánin saqtap, ulttyq qundylyqtardy keıingi urpaqqa ónege etý qajettigi aıtyldy.

Aq dastarqan basynda ótken kezdesýde kónekóz qarııalar da óz oılaryn jetkizip, izgi tilekterin aıtty. El amandyǵy men jurt berekesin tilep, batasyn berdi.