ASTANADAN «QAIYRYMDYLYQ KERÝENI» JOL TARTTY (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń bastamasymen sý tasqynynan zardap shekken turǵyndarǵa qoldaý kórsetý maqsatynda elordasy Astanadan Qostanaı óńirine «Qaıyrymdylyq kerýeni» jol tartty.

QMDB «Zeket jáne qaıyrymdylyq» qorynyń Astana qalalyq ókildigi, elordalyq ımamdar men belsendi jastar, erikti jamaǵat atsalysqan ıgi is-sharaǵa Bas múftı arnaıy qatysty.

«Qaıyrymdylyq – adamnyń asyl qasıetteriniń biri. Kisiniń aınalasyndaǵy adamdarǵa degen yqylasy men kómegin adamgershilik qarym-qatynastaryn bildiredi. Búgin Qazaqstan musylmandary dinı basqarmasy elimiz boıynsha «Qaıyrymdylyq kereýeni» jobasyn qolǵa aldy. Qaıyrymdylyq kómek aıasynda sý tasqynynan zardap shekken jerlesterimizge turmysqa qajetti zattar men áleýmettik mańyzy bar azyq-túlik jóneltiledi. Búgin Astana qalasy boıynsha meshitter qajetti zattardy sý basqan aımaqtarǵa jiberýde.

Ata-babamyz osyndaı qysqa jip kúrmeýge kelmeıtin qysyltaıań shaqtarda aýyzbirshilikti, adaldyqty, yntymaqty tý etip kótergen. Ásirese, kóptiń máselesin qara bastyń qamynan joǵary qoıǵan. «Bir úı ash bolsa, bir aýyl ash, bir aýyl ash bolsa, búkil el ash» degen qaǵıdany berik ustanyp, adam taǵdyry ulys taǵdyrymen tyǵyz baılanysty ekenin qapysyz tanyǵan.

Alla Taǵala qaıyrymdylyq iske atsalysqan barsha azamattarǵa razy bolsyn. Bul synaqtyń sońy qýanysh pen jaqsylyqqa ulasqaı. Ámın» dedi Naýryzbaı qajy Taǵanuly.

Aıta keteıik, jalpy kólemi 25 tonna bolatyn azyq-túlik, kıim-keshek pen turmysqa qajetti zattar Qostanaı oblysynyń Arqalyq qalasyna jol tartty.

​