Astanada postmodernızm stılinde salynǵan jańa meshit ashyldy (FOTO)
Búgin Astana qalasynda sáýleti erekshe meshit ashyldy. Alla úıiniń ashylý saltanatty rásimine memleket jáne qoǵam qaıratkerleri qatysty.
Saltanaty sharada sóz alǵan Bas múftı Serikbaı qajy Oraz:
«Búgin – kúlli musylman qaýymynyń rýhanı ómirinde tarıhı kún. Qasıetti Ramazan aıynyń qarsańynda elimizde tuńǵysh ret postmodernızm stılinde salynǵan meshit esigin aıqara ashty. Balamaly Energııa kózderimen qamtamasyz etiletin nómiri birinshi quthanamyz qutty bolsyn, ardaqty aǵaıyn! Biz mundaı nyǵmetke eldigimiz ben erligimizdiń, birligimiz ben táýelsizdigimizdiń arqasynda jettik. Allaǵa sansyz maqtaýlar bolsyn! Osy meshittiń salynýyna qamqorlyq tanytqan, el qamynda júrgen Elbasy men el aǵalaryna Alla razy bolsyn!
Halqymyzda: «Azany bar aýyl azbaıdy», – degen naqyl bar. Meshit – súıispenshilik pen baýyrmaldyqtyń, ıgilik pen izgiliktiń, birlik pen meıirimdiliktiń, barsha jaqsylyqtyń toǵysqan qutty mekeni. Meshit – Allanyń úıi. Adamzat balasynyń rýhanı turǵydan damýy men pendeniń tulaboıyna adamgershilik qundylyqtardy uıalatýda meshittiń orny qashan da mańyzdy. Bul meshit qulshylyqtyń ǵana ordasy bolyp qalmaı, rýhanı hám mádenı-aǵartý, qoǵamdyq kelisim men birlik pen berekeniń oshaǵyna aınalady degen senimdemin. Jańa meshit, sonymen qatar salt-dástúrimizdiń, taǵylymǵa toly tarıhymyzdyń nasıhatshysy, dinı hám ǵylymı jańalyqtardyń ári qaıyrymdylyqtyń ortalyǵy bolady.
Paıǵambarymyz Muhammed (oǵan Allanyń salaýaty men sálemi bolsyn) óziniń qasıetti hadıs-sharıfinde: «Meshit salǵan adam úshin Alla Taǵala jánnatta saraı turǵyzady». Meshit salý – saýaby úzilmeıtin saýapty is! Osy quthananyń qurylysyn qolǵa alǵan dinimizdiń janashyr azamattaryna, Alla úıiniń boıkóterýine tileýlestik bildirgen jamaǵatqa Alla razy bolsyn», – dedi.
Bas múftıden keıin sóz alǵan QR Din isteri jáne azamattyq qoǵam mınıstri Darhan Káletaev jamaǵatty jańa meshittiń ashylýymen quttyqtap, izgi tilegin jetkizdi.
Anyqtama:
Esil ózeniniń oń jaǵalaýynda ornalasqan meshittiń qurylysy 2016 jyly bastaldy. Jańa meshit qaıyrymdylyq maqsatpen jınalǵan qarajat esebinen turǵyzyldy. Meshit ǵımaraty dástúrli órnekter men dekoratıvti Elementter qoldanyla otyryp, postmodernızm stılinde salynǵan. Negizgi ǵımarat kúrdeli ári jartylaı sferalyq nysandy elestetedi. Onyń qabyrǵalary úshburyshtana súıirlenip, dıametri 26 metrlik kúmbezben jalǵasqan. Meshittiń syrtqy dızaıny gúldi ári almastyń qyrlaryn eske salady.
Meshittiń basty ǵımaratynyń soltústik jaǵynda ornalasqan munaranyń bıiktigi – 43,5 metr. Ol «qalam» – «qasıetti qaýyrsyn» túrinde boı kótergen.
Jańa meshitti Energııa qýatymen qamtamasyz etý úshin paıdalanylatyn balamaly Energııa kózderi qajetti mólsherden úsh ese kóp Elektr qýatyn óndiredi. Jańa meshit 750 adamǵa laıyqtalǵan.
Meshit ǵımaratynyń aýdany – 2248 sharshy metr. Ornalasqan jerdiń aýdany – 1,44 ga.
