Astanada onynshy meshit esigin aıqara ashty

Keshe Astana qalasynda "Aq meshit" meshitiniń ashylý saltanaty ótti. Igi sharaǵa Qazaqstan musylmandary dinı basqarmasynyń tóraǵasy Serikbaı qajy Oraz qatysty.

Saltanatty rəsim qasıetti Quran aıatymen ashyldy. QMDB tóraǵasynyń Birinshi orynbasary, naıb múftı Naýryzbaı qajy Taǵanuly alǵashqy sózdi Bas múftıge usyndy.

"Meshit – súıispenshilik pen baýyrmaldyqtyń, ıgilik pen izgiliktiń, birlik pen meıirimdiliktiń, barsha jaqsylyqtyń toǵysqan qutty mekeni. Meshit – Allanyń úıi. Adamzat balasynyń rýhanı turǵydan damýy men pendeniń tulaboıyna adamgershilik qundylyqtardy uıalatýda meshittiń orny qashan da mańyzdy. Qazaq topyraǵynda boı kótergen meshitterdiń tálim men taǵylymnyń, bilim men ǵylymnyń rýhanı ordasyna aınalǵany osynyń aıǵaǵy. Bul meshit qulshylyqtyń ǵana ordasy bolyp qalmaı, rýhanı hám mádenı-aǵartý, qoǵamdyq kelisim men birlik pen berekeniń oshaǵyna aınalady degen senimdemin. Jańa meshit, sonymen qatar salt-dástúrimizdiń, taǵylymǵa toly tarıhymyzdyń nasıhatshysy, dinı hám ǵylymı jańalyqtardyń ári qaıyrymdylyqtyń ortalyǵy bolady. Rasynda, ómirdiń tirshiliksiz, al tirshiliktiń qulshylyqsyz quny joq. Islam dini tirshilik pen qulshylyqty qatar úılestirip, ónegeli ómir saltyn sabaqtastyryp, ǵumyr keshýge úndeıdi. Paıǵambarymyz Muhammed (oǵan Allanyń salaýaty men sálemi bolsyn) óziniń qasıetti hadıs-sharıfinde: «Alla Taǵala meshitti jaqsy kórgen pendeni jaqsy kóredi», – degen. Taǵy bir hadıste aıtylǵandaı, «meshit salǵan adam úshin Alla Taǵala jánnatta saraı turǵyzady». Meshit salý – saýaby úzilmeıtin saýapty is! Osy rette meshitti salǵan azamattarǵa aıryqsha alǵysymdy bildiremin", - dedi Serikbaı qajy Satybaldyuly.

Osydan keıin Bas múftı juma ýaǵyzyn aıtyp, juma namazyn júrgizdi.

Aıta keteıik, "Aq meshitte" bir mezette 1200 adam qulshylyǵyn óteı alady. Meshit janynda medrese salynǵan.

Bas múftı buıryǵymen belgili din qyzmetkeri Dáýren Múslimov "Aq meshittiń" Bas ımamy qyzmetine taǵaıyndaldy.