Astanada Kópbalaly analar qaýymdastyǵy qurylmaq
Astana qalasynyń Qoǵamdyq keńesi elordada Kópbalaly analar qaýymdastyǵyn qurýdy kózdep otyr.
«Biz qazirgi ýaqytta Kópbalaly analar qaýymdastyǵyn qurýdy kózdep otyrmyz. Ol qaýymdastyqqa belsendiler ense deımiz. Osylaısha, belsendilermen birge kópbalaly otbasylardyń máselelerin sheshýdi oılastyrýdamyz. Meniń oıymsha, bul durys qadam. Jýyq arada biz qaýymdastyqty qurý týraly jumysty aıaǵyna deıin jetkizemiz», - dedi Astana qalasy Qoǵamdyq keńesiniń tóraǵasy Sansyzbaı Esilov elorda ákimdiginde ótken jıynda.
Eske sala ketsek, buǵan deıin Astana qalasy Qoǵamdyq keńesiniń tóraǵasy Sansyzbaı Esilov elordadaǵy kópbalaly otbasylardyń máselesi týraly sóz qozǵap, olardyń baspana máselesin jeke-jeke kezek boıynsha sheshý kerektigin málim etken edi.
«Memleket bul máselege bet burar degen oıdamyn. Qazirgi ýaqytta Úkimet jumys tobyn quryp, atalmysh máseleni sheshýdi kózdep otyr. Kópbalaly otbasylardyń eń aldymen baspana máselesin sheshý kerektigi týraly bastamany 100 paıyz qoldaımyz. Sebebi, bul otbasylar kúrdeli materıaldyq jaǵdaıymen qosa baspanany jaldap turýǵa májbúr. 50-100 myń teńgege kishkene ǵana bólme jaldap turady. Sol sebepti, kópbalaly otbasylardyń eń aldymen baspana máselesin sheshý kerek. Jetim balalar, soǵys ardagerleri sııaqty kópbalaly otbasylardyń da baspana boıynsha jeke kezegi bolýy tıis. Sebebi, qazirgi ýaqytta elordadaǵy baspana boıynsha ortaq kezekte 46 myńǵa jýyq adam tur», - deıdi Sansyzbaı Esilov.
