ASTANADA ÁIEL-QYZDAR ARASYNDA QURAN SAIYSY ÓTTI

Astana qalasy ókildigi Áıel-qyzdar sektorynyń uıymdastyrýymen «Aq meshit» meshitinde qyz-kelinshekter arasynda Quran saıysy ótti. Qazaqstan musylmandary dinı basqarmasynyń Áıel-qyzdar sektorynyń 10 jyldyq mereıtoıyna arnalǵan baıqaýǵa Astana qalasynyń bas ımamy Nurbek qajy Áýeshanuly arnaıy qatysty.

Saıystyń ashylýynda sóz sóılegen bas ımam ataýly mereıtoımen quttyqtaı otyryp, áıel adamnyń bilim alýy men urpaq tárbıesindegi ornyna toqtaldy. Sondaı-aq áıel jamaǵatynyń dinı saýatyn arttyrýǵa úles qosyp júrgen ustazdarǵa alǵys bildirip, qatysýshylarǵa sáttilik tiledi.

«Áıel – otbasynyń uıytqysy, balanyń alǵashqy ustazy. Sondyqtan ananyń bilimdi bolýy urpaq tárbıesinde aıryqsha mańyzǵa ıe. Qazaq «Bir qolymen besikti, bir qolymen álemdi terbetken» dep áıeldiń qoǵamdaǵy ornyn beker baǵalamaǵan. Búgingi saıysqa qatysyp otyrǵan shákirtterdiń Quranǵa degen yqylasy men bilimge umtylysy da ustazdar eńbeginiń jemisi. Barsha ustazdar qaýymyna osy joldaǵy eńbekteri úshin alǵysymdy bildiremin. Qurandy oqý men jattaý ǵana emes, onyń maǵynasyn túsinip, ónegesin ómirde ustaný mańyzdy. Bilim jolynan taımaı, Quranǵa degen yqylastaryńyzdy arttyra berińizder», – dedi Nurbek qajy Áýeshanuly.

Quran saıysy eki nomınatsııa boıynsha uıymdastyryldy. Birinshi kezeńde qatysýshylar «Nábá» súresinen «Nás» súresine deıingi súrelerdi, ıaǵnı Qurannyń 30-parasyn jatqa oqydy. Ekinshi kezeńde «Dýha» súresinen «Nás» súresine deıingi súrelerdi jatqa tapsyrdy. Ádilqazylar alqasy qatysýshylardyń daıyndyǵy men Qurandy jatqa oqý deńgeıin baǵalady.

Saıys qorytyndysy boıynsha jeńimpazdar anyqtalyp, marapattaý rásimi ótti. Astana qalasynyń bas ımamy Nurbek qajy Áýeshanuly júldeli oryn ıelerine dıplomdar men syılyqtar tabystady. Sondaı-aq ádilqazylar alqasynyń músheleri de marapattaldy.

Saıys qorytyndysy tómendegideı:

30-para boıynsha:

I oryn — Sáken Araılym (100 000 teńge)
II oryn — Tsechoeva Aısha (80 000 teńge)
III oryn — Qasymova Kamıla (50 000 teńge)

«Duha»-«Nas» súreleri boıynsha:

I oryn — Abýova Uljan (50 000 teńge)
II oryn — Tanbaı Perızat (40 000 teńge)
III oryn — Baltashova Aıaýlym (30 000 teńge)

Источник: Aisha