Astanada «Adamzattyń abzaly» atty Máýlit keshi ótti (FOTO)
Keshe Astana tórindegi Beıbitshilik jáne kelisim saraıynda Elorda jurtshylyǵynyń júregin eljiretip, janaryn móldiretken rýhanı Máýlit keshi bolyp ótti. Astana qalasy ókildiginiń uıymdastyrýymen ótken «Adamzatty abzaly» atty rýhanı keshte Súıikti Paıǵambarymyzǵa (s.ǵ.s.) sansyz salaýattar joldanyp, Áz Elshiniń (s.ǵ.s.) ónegeli ómiri men ósıetteri halyq jadynda taǵy bir jańǵyrdy.
Ardaqty Alla elshisiniń (s.ǵ.s.) dúnıege kelgen sátinen bastap kúlli álemdi ǵalamat meıirim men raqym nury baýraǵanyn baıandaýdan bastalyp, kesh boıy adamzattyń abzaly bolǵan uly tulǵanyń jan-jaqty qyrlary jetkizilip otyrdy. Kórermen qaýymǵa keńinen tanys Nartaı Saýdanbekuly men Qýandyq Qystyqbaevtar kesh tizginin ustap, jurtshylyqty taǵylymdy sózderimen sýsyndatty. Belgili kompozıtor Jáken Omarovtyń qazaq tilinde jazǵan Máýlit jyry da kórermenniń ystyq yqylasyna bólenip, Súıikti Paıǵambarymyzǵa (s.ǵ.s.) barshasy tik turǵan qalpy salaýat joldady.
Qazaqy qara óleń oqylyp, aıtysker aqyndarymyz baýyryn jazǵan Rýhanı kesh kórigin elimizge belgili «Óner qyrandary» teatrynyń maıtalmandary odan ary qyzdyra tústi. Kúldire otyryp kúrsintken teatr akterlary «Jańbyrly jas», «Poıyzdaǵy oqıǵa», «Ardaqty paıǵambar» sekildi úsh qoıylym qoıyp, kórermen kóńilin bosatty.
Elimizge belgil Serjanáli Álibek, Qurmash Mahan sekildi jeztańdaı ánshilerimiz de Máýlit keshiniń sánin kirgizip, Álemderdiń Rabbysyna madaq pen shúkir aıtqan taǵylymdy ánderimen merekelik sharany árleı tústi.
Kesh aıasynda respýblıkalyq «Áziret Sultan» meshiti uıymdastyrǵan «Paıǵambarlar sultany» jyr músháırasynyń qorytyndysy jarııalanyp, júzden júırik shyqqan jeńimpaz aqyn Bas múftı Serik qajy Oraz qolynan kishi qajylyq sertıfıkatyn aldy.
Sondaı-aq, bıylǵy jyly tuńǵysh ret Máýlit merekesiniń qurmetine oraı halyq arasyndaǵy úlgili jandarǵa «Máýlit syılyǵy» tabystalyp, elge sińirgen eńbekteri pash etildi. Atap aıtqanda, «Úlgili ustaz», «Ónertapqysh jas ǵalym», «Janashyr júrek», «Tálimger tulǵa», «Qamqor otbasy» nomınatsııalary boıynsha arnaıy «Alǵys hat» berilip, baǵaly syılyqtarmen marapattaldy.
Sýretterdi «FOTOGALEREIa» aıdarynan kóre alasyzdar!
