ASTANA QALASYNDA DIN MEN DÁSTÚR BAǴYTYNDA KELINDER SAIYSY ÓTTI (FOTO) 

QMDB Astana qalasy ókildigi «Áıel-qyzdar» sektorynyń uıymdastyrýymen «Din men dástúr» baǵyty aıasynda Elorda meshitteriniń áıel jamaǵaty arasynda «Qazaqtyń kelinderi-aı!» atty saıys bolyp ótti.  

Astana qalasy ókildigine qarasty «Aq meshit» meshitinde ótken babadan mura bop kele jatqan rýhanı qundylyqtarymyzdy beıneleıtin sharaǵa QMDB Din men dástúr bóliminiń meńgerýshisi Nurbek Áýeshanuly, Astana qalasynyń jáne «Áziret Sultan» meshitiniń bas ımamy Erbolat Júsipov, «Aqmeshit» meshitiniń bas ımamy Mýslımov jáne elorda meshitteriniń áıel jamaǵaty qatysty. 

Sondaı-aq, qazylar alqasy quramynda Respýblıkalyq Bas meshittiń ustazy Qarlyǵash Málikqyzy, Astana qalasy qyzdar medresesiniń ustazy Jańagúl Dalagúlova jáne Beısekúl Úkimbaeva esimdi aq jaýlyqty ájelerimiz tórelik etti.

Baǵzydan jalǵasyp, búginge deıin tizbektelip jetken qazaq kelinderine tán ádep pen ıba, úlkenge degen qurmet pen syılastyq, ádet-ǵurypqa degen beriktikti nasıhattaıtyn saıysta qatysýshy qyz-kelinshekter bar ónerin ortaǵa saldy.

Shara barysynda «Bastańǵy», «Besikke salý», «Kelin kóńili», «Qursaq shashý», «Óńirjıek taǵý», «Sálem salý», «Tabaq sálemi», «Tusaý kesý» syndy jón-joralǵylar oryndalyp, jeńimpazdar anyqtaldy. 

Sýretterdi tolyǵyraq «FOTOGALEREIa» aıdarynan kóre alasyzdar!

Источник: Aidos