ASTANA ÓKILDIGINIŃ DIN QYZMETKERLERI ETNOAÝYLǴA EKSKÝRSIIa JASADY (FOTO)
Qazaqstan musylmandary dinı basqarmasy Astana qalasynyń ókili, «Áziret Sultan» meshitiniń Bas ımamy Erbolat Júsipov bastaǵan din qyzmetkerleri, meshit aqsaqaldary men aq jaýlyqty ájeler qaýymy V dúnıejúzilik kóshpendiler oıyndary ótip jatqan Elordadaǵy Etnoaýylǵa arnaıy baryp Ekskýrsııa jasap qaıtty.
Respýblıka boıynsha kúlli oblys kelip kıiz úı tikken aýmaqta, ártúrli ulttyq-mádenı baǵdarlamalar ótip jatyr eken. Elimizdiń ár óńiri ózindik ulttyq-mádenı erekshelikterin pash etip, álemniń túkpir-túkpirinen kelgen sheteldik qonaqtardy tánti etýde.
Etnoaýyl birneshe orynǵa bólinedi: Ortalyq alań, ulttyq oıyndarǵa arnalǵan balalar oıyn alańy, halyq mýzykasyna arnalǵan shatyr, ashyq aspan astyndaǵy kóshpeli Órkenıetter murajaıy, sporttyq is-sharalar, ulttyq taǵamdar, basty sahna, aımaqtardyń Etno-qonystary, qolónershiler jáne shyǵys bazary bar arnaıy qala. Sondaı-aq Etnoaýyl aýmaǵynda kóptegen kádesyılar tabýǵa bolatyn shyǵys bazary uıymdastyrylyp, elimizdiń eki júzden astam qolónershileri óz ónimderin usynýda.
Astana qalasynyń Bas ımamy Erbolat Nuryldauly:
«QMDB tóraǵasy, Bas múftı Naýryzbaı qajy Taǵanuly haziretimizdiń bekitken Din men dástúr baǵyty aıasynda búgin V dúnıejúzilik kóshpendiler oıyndary ótip jatqan aýmaqqa at basyn burdyq. Qala basshylyǵy jáne Din isteri basqarmasymen birlese otyryp, biz de osy bir sharany uıymdastyryp otyrmyz. Munda Etnoaýylda ótip jatqan keremet sharalardyń kýási bolyp jatyrmyz. Dinimiz ben dástúrimiz qashanda bite qaınasyp kelgen. Meshitimizdegi aqsaqaldar men aq jaýlyqty analarymyz tań-tamasha áser alýda. Búgin ultymyzdyń baı tarıhy men rýhanı qundylyqtary qaıta jańǵyryp, elimizge álem jurshylyǵynyń nazary aýyp jatyr. Qarııalarymyz da ózderiniń aq batasyn berip jatyr. Elimizdiń birligi men berekesi arta bersin!», - dep óziniń izgi lebizin bildirdi.
Sýretterdi tolyǵyraq «FOTOGALEREIa» aıdarynan kóre alasyzdar!
Источник: Aidos
