«Astana - meıirimdi qala» jobasy júrekterge jylý syılady (FOTO)

Qylyshyn súıretip qys kelgeli Astana jurtshylyǵynyń qarbalasy kóbeıe túsetini belgili. Saqyldaǵan sary aıaz ben úskirik jel eldi ábden ábigerge túsirip, qala ómirine qatty áserin tıgizip jatatyny taǵy bar. Ásirese, sońǵy kúnderi kúshine mingen Arqanyń adýyndy aıazy mektepterdegi sabaqty toqtatyp, talaı mekemeniń mezgilsiz demalys jarııalaýyna májbúrlep keledi.

Alaıda, qaharly qystyń qarly borany men aqshunaq aıazyna qaramastan Astana qalasynyń qoǵamdyq jumysy bir sátke de tolastamastan, halyq ıgiligi jolynda qaltqysyz jumys atqaryp júrgen jandar da az emes.

Osy oraıda, QMDB tóraǵasynyń birinshi orynbasary, naıb múftı Naýryzbaı qajy Taǵanulynyń bastamasymen Astana qalasy ókildiginiń «Astana – meıirimdi qala» jobasy iske qosylyp otyr. Joba aıasynda respýblıkalyq «Áziret Sultan» meshitiniń qyzmetkerleri búgin qala kóshelerin aralap, qoǵamdyq jumysshy qaýymnyń júrekterine jylý syılaýǵa tyrysty. Temperatýra tilshigi  40 gradýstan tómen qulaǵan aýa-raıynda da óz jumystaryn múltiksiz atqaryp júrgen jandarǵa meshit ımamdary ystyq tamaq pen sýsyn taratyp, demeý sózderimen jandaryn jylytty.

Aıta keteıik, Astana qalasynyń ókil ımamy Naýryzbaı qajy Taǵanulynyń tapsyrmasy negizinde «Astana – meıirimdi qala» jobasy qys boıy jalǵasatyn bolmaq. Bas meshitten bastaý alǵan meıirimdilik aktsııasy aldaǵy kúnderi Astana qalasynyń barlyq meshitterinde jalǵasyn taýyp, jan jylýymen bólisken jandar kóbeıe bermek. Osy oraıda, qala meshitterindegi kúndelikti ýaǵyz-nasıhat barysynda da ımamdar meshit jamaǵatyn meıirimdilikke úndep, aıazdy kúnderi aınalamyzdaǵylarǵa janashyr bolýǵa shaqyryp keledi.

Sýretterdi «FOTOGALEREIa» aıdarynan kóre alasyzdar!