ÁS-SYǴANAQI INSTITÝTYNYŃ QARILARYNA IJAZA KÝÁLIGI BERILDI

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Hýsamýddın as-Syǵanaqı atyndaǵy ıslam ınstıtýtynyń Astana qalasyndaǵy «Ijaza» ortalyǵynda bilim alǵan túlekterine «Quran ıjazasy» kýáligin tabystady.
Respýblıkalyq bas meshitte ótken ıgi is-shara qasıetti Quran aıattaryn oqýmen bastaldy. Alǵash sóz alǵan QMDB Tóraǵasy oqý ordasynyń búgingi jetistigine toqtalyp, ustazdardyń eren eńbegin atap ótti.
«Imam Naýaýı bir sózinde: «Ilimde úlken jetistikke jetýdiń áýelgi qadamy – Qurandy jattaý, óıtkeni ol – búkil ilimniń anasy. Izgi musylmandar Qurandy tolyq jatqa bilmeıtin adamnan hadıs nemese fıqh úırenbeıtin» degen eken. Alla Taǵala bizderge: «Rasynda Qurandy úgit úshin ońaılastyrdyq. Al sonda túsinýshi bar ma?» deıdi. Ǵulamalarymyz bul aıat jaıly tápsir túsindirmelerinde: «Biz bul Qurannyń sózderin oqýǵa, jattaýǵa, maǵynasy men syryn tereń túsinýge jeńil ettik. Eger adam qasıetti Quranǵa bet bursa, Uly Alla ol adamǵa kózdegen maqsatyna jetýge kómektesip, jolyn jeńil etedi. Sondyqtan Qurandy jattaý, oqý, túsiný óte jeńil jáne óte maqtaýly amaldardan» degen eken.
Quran jattaǵan sizderge ómirde sáttilik, joldaryńyz ashyq, árqashan Quranǵa qyzmet etetin úlken ustazdardan bolýlaryńyzdy shyn júrekten tileımin» dedi Bas múftı.
Aıta keteıik, Hýsamýddın as-Syǵanaqı atyndaǵy ıslam ınstıtýtynyń Astanadaǵy «Ijaza» bóliminde alǵash ret tálim alǵan 13 shákirt doktor Sabrı Muhammed Abdelazım Alı, doktor Iaser Ahmad Mýrsı Muhammed Sýtýhı jáne doktor Mahmud Muhammed Mahmud Hassannan Asym qyraǵatynyń hafs rıýaıatyna saı shatybııa joly boıynsha ıjaza kýáligin aldy.
Aıtýly shara sońynda QMDB Tóraǵasy qarılarǵa jyl boıy dáris bergen mysyrlyq úsh ustazǵa alǵys hat tabystap, syı-sııapat jasady.

 

Источник: Aidos