Arysta 435 úıge jóndeý jumystary bastaldy

Arysta 435 úıge jóndeý jumystary bastaldy. Bul jaıynda Túrkistan oblysy ákiminiń baspasóz qyzmeti habar taratty.

Ákimdiktegilerdiń málimetinshe, Arys qalasy men qala mańynda 8867 úı bar. Sonyń 6127 úıi jarylystan búlingen. Osylaısha 27 úı tolyqtaı qaıtadan salynatyn boldy.

«Qazirgi tańda Arys qalasy 17 sektorǵa bólingen. Bul sektorlardaǵy jóndeý jumystaryna respýblıkanyń 16 oblysynan jáne Nur-Sultan qalasynan 170 arnaıy brıgada kelip, 1194 qurylysshy iske kiristi. Olar turǵyn úılerdi baǵalaý jumystaryn júrgizip, 435 úıge jóndeý jumystaryn bastap ketti», – delingen ákimdiktiń baspasóz habarlamasynda.

Jalpy, Arys qalasyndaǵy búlingen úı-jaılar 17 sektorǵa bólinip jóndeletin bolmaq.

Aıta keteıik, 24-maýsymda saǵat 9.20-da Arys mańyndaǵy áskerı bólim terrıtorııasynda ornalasqan qarý-jaraq qoımasynda oq-dáriler jarylǵan bolatyn. Keıinirek Qazaqstan Prezıdenti Qasym-Jomart Toqaev Arysqa baryp, jarylystyń zardaptaryn joıý jóninde shuǵyl sharalar qabyldaýdy tapsyrǵan edi.