Ár qurban shalýshyǵa 1 saǵat ýaqyt beriledi (FOTO)

Ortalyq kommýnıkatsııalar qyzmetinde ótken brıfıngte QMDB Tóraǵasynyń orynbasary, naıb múftı Ershat qajy Ońǵar karantın jaǵdaıyna baılanysty oflaın formatta qurban shalýshylar birqatar erejelerdi eskerý kerektigin alǵa tartty.

«20 shilde kúni saǵat 07:20 dan bastap «sary», «jasyl» aımaqtaǵy óńirlerdegi aldyn ala jazylǵan tulǵalar belgilengen ýaqytta ákimdik tarapynan bekitilgen arnaıy orynǵa baryp oflaın formatta qurban shalady. Árbir adamǵa 1 saǵat ýaqyt beriledi. Oflaın formatta qurban shalýshy QMDB-nyń jaýapty tulǵasyna «ASHYQ» baǵdarlamasy arqyly óz statýsyn kórsetý qajet. Qurban shalý «jasyl» jáne «kók» tústerdegi tulǵalarǵa ǵana ruqsat etiledi. «Qyzyl» jáne «sary» tústerdegi tulǵalarǵa ruqsat etilmeıdi. Bul – karantın jaǵdaıyndaǵy eskerýimiz mindetti talap», – dedi Ershat qajy Ońǵar.

Sondaı-aq naıb múftı qurban shalýshylarǵa qasaphanalarda tazalyqqa mán berip, sanıtarlyq talaptardy qatań saqtaý kerektigin aıtty.

«Qurbandyq malyn soıdyrýǵa, satyp alýǵa, satý, ony soıý kezinde sanıtarlyq talaptar, tazalyq jaǵyna mán berýge shaqyramyz. Dinimizde tazalyqtyń mańyzy joǵary. Qasaphanaǵa maska taǵyp, araqashyqtyq saqtap, dene qyzýy bar adamdardyń jaqyndaýyna jol bermeýimiz kerek. Jasy 65-ten asqan qarııalar, áıelder men balalar qurban shalatyn oryndarǵa barmaǵany abzal», – dedi QMDB Tóraǵasynyń orynbasary.