«Aqyl, qaırat bilimdi teń ustaǵan»: Abaıdyń 175 jyldyǵyna oraı 175 suraq (FOTO)
Elimizde hakim Abaıdyń 175 jyldyǵy keń aýqymdy túrde nasıhattalyp ári atalyp ótýde. Bul ıgi iske Qazaqstan musylmandary dinı basqarmasyna qarasty meshitter de óz úlesterin aıtarlyqtaı qosýda.
Osy oraıda Nur-Sultan qalasyndaǵy «Rahymqyzy Raısa ana» meshiti Abaı Qunanbaıulynyń 175 jyldyǵyna oraı «Aqyl, qaırat, bilimdi teń ustaǵan» atty ıntellektýaldyq saıys ótkizdi. QMDB-nyń 30 jyldyǵyna oraı «30 shara» jospary aıasynda uıymdastyrylǵan ıntelektýaldyq saıystyń bast erekshiligi hakim Abaıdyń 175 jyldyǵyna oraı 175 suraqtan turatyndyǵynda boldy.
Elordamyzdaǵy kolledj, ýnıversıtet stýdentteri men túrli salanyń mamandary jáne kásipkerlerden quralǵan 7 toptyń bilim deńgeıi men biliktilikterin baǵalap, ádil baǵasyn berý QMDB dinı bilim jáne kadr bóliminiń mamany Qojın Jańabaı Maratuly, «Áziret Sultan» respýblıkalyq meshitiniń naıb ımamy Dinmuhammed Smanov, «Tólebaı» meshitiniń ustazy Hasenov Saıat Serikulynan quralǵan qazylar alqasyna júkteldi.
Shara basynda sóz alǵan Dinmuhammed Smanov bıylǵy jyly elimizde óte mańyzdy birneshe mereıtoılardyń qatar kelgenin, onyń árbiriniń halqymyz arasynda keńinen nasıhattalýy ulttyq rýhanı qundylyqtarymyzdy jańǵyrtýda mańyzdy ekenin atap ótti. Sonyń ishinde hakim Abaıdyń tulǵasy men «tolyq adam» ıdeıasynyń nasıhattalýyna úles qosyp jatqan «Rahymqyzy Raısa ana» meshitiniń ujymyna, Bas ımam Qalıjan Zańqoevqa alǵysyn bildirdi jáne qatysýshylarǵa tabys tiledi.
Hakim Abaıdyń týǵan kezeńinen bastap bilim izdengen jastyq shaǵy, el basqarǵan bolystyq kezeńi, otbasy, shyǵarmashylyǵy túgel derlik qamtylǵan saıysta belsendiligimen, bilimimen erekshelengen «Fırdaýs» toby I-oryn ıegeri atanyp, jaqynda ǵana jaryq kórgen Quran tápsiri kitabyna ıe boldy. Al, júldeli II jáne III oryndardy «Múbárak» jáne «Qurmet» toptary ózara bólisti.
Saıys sońynda sóz sóılegen «Rahymqyzy Raısa ana» meshitiniń Bas ımamy Qalıjan Zańqoev tórelik etken ádilqazylar alqasyna, bir aı ýaqyt kóleminde daıyndyq jasap, aıryqsha ynta-yqylas kórsetken qatysýshylarǵa óz rızashylyǵyn bildirdi. Sonymen birge, mundaı sharalardan árbir qatysýshynyń paıdaly bilim alyp shyǵatynyn, halyqtyń bas aqyny Abaıdy tanýda atalmysh sharalardyń jıi ótýi mańyzdy ekenin aıtyp ótti.
