«Aqtóbe» medrese-kolledjiniń sport kesheni ashyldy (FOTO)
Táýelsizdik merekesine oraı, «Aqtóbe» medrese-kolledjiniń sport kesheni paıdalanýǵa berildi. Keshenniń ashylý saltanatyna QMDB-nyń naıb múftıi Ershat qajy Ońǵarov, QMDB-nyń Sharıǵat jáne pátýa bóliminiń meńgerýshisi Sansyzbaı qajy Qurbanuly, Alǵa aýdanynyń ákimi Mamyrǵalı Aqqaǵazov, Atyraý oblysynyń bas ımamy Altynbek qajy Utyshan, Aqtóbe oblysynyń bas ımamy Tólebı qajy Ospan jáne jergilikti dinı qyzmetkerler men meshit jamaǵaty, shákirtter, sondaı-aq, Nur-Sultan, Almaty, Atyraý qalalarynan arnaıy kelgen qonaqtar qatysty.
Saltanatty jıynda Ershat qajy Aǵybaıuly, Mamyrǵalı Dosqululy jáne atyraýlyq kásipker Kelbatyr Qaıyruly sóz sóılep, jınalǵan jurtshylyqty Táýelsizdik kúnimen quttyqtap, jańa sport kesheniniń jumysyna tabys tiledi.
«Eń áýeli barshańyzǵa Bas múftı Serikbaı qajy Satybaldyuly hazrettiń ystyq yqylasy men sálemin jetkizýge ruqsat etińizder. Táýelsizdik merekesi qutty bolsyn! Búgingi paıdalanýǵa berilgen sport kesheni – Aqtóbe medresesiniń áleýetin taǵy bir satyǵa kóterdi. Paıǵambarymyz (oǵan Allanyń salaýaty men sálemi bolsyn): «Kúshti musylman, álsiz musylmannan abzalyraq», - degendeı, bul shákirtterdiń salaýatty ómir saltyn qalyptastyrýyna jańa múmkindik beretini sózsiz. Shákirtterdiń bos ýaqytynda sportpen shuǵyldanyp, shynyǵýyna jaqsy jaǵdaı jasalyp otyr. Óz atymnan Aqtóbe medrese-kolledjiniń dırektory bastaǵan ujymyna alǵys bildiremin. Sondaı-aq, jańa keshenniń zamanaýı talaptarǵa saı bolyp bitýine qarjylaı kómek kórsetken jomart kásipkerler men barsha qaıyrymdy azamattarǵa Alla razy bolsyn!» dedi Ershat qajy Aǵybaıuly.
Naıb múftı sport keshenine qomaqty qarjy bólip, demeýshilik jasaǵan atyraýlyq kásipker Kelbatyr Qaıyrulynyń ıyǵyna qazaqy dástúr boıynsha Bas múftıdiń atynan shapan jaýyp, alǵys hatpen marapattady.
Keshen – sporttyq oıyndarǵa qajetti zattarmen tolyqtaı jabdyqtalǵan. Fýtbol, voleıbol oıyndary men kúreske arnalǵan formalar da alynǵan. Sý jańa keshende eptiler men bilektiler ózara kúsh synasyp, ártúrli sporttyq jarystar ótti. Saıysta «júzden – júırik, myńnan – tulpar shyqqan» jeńimpazdarǵa laıyqty júldeler tabystaldy.
Eske salsaq, búginde elimiz boıynsha 9 medrese bar. Olardyń 5-ýi kolledj statýsyna ıe. Solardyń biri – Aqtóbe medrese-kolledji. 10 jyldan astam ýaqyt ishinde bul dinı oqý orny 142 túlek shyǵardy. Aqtóbe oblysynda 110 ımam bolsa, solardyń 40 paıyzy – osy medreseniń túlekteri. Demek, oblystaǵy dinı kadr daıarlaý isine óz úlesin qosýda dep aıtýǵa tolyqtaı negiz bar. Shara barysynda osy eńbek eskerilip, medrese-kolledj dırektory Ábdimútáli Dáýrenbekov jergilikti dinı kadr daıarlaý isine qosqan úlesi úshin Bas múftı atynan alǵys hatpen marapattaldy. Odan bólek, elimizdiń basqa óńirleriniń de jetkinshekteri osynda tegin bilim alýda. Al mereke kúni ashylǵan sporttyq keshen – aldaǵy ýaqytta medrese-kolledj shákirtteriniń túrli sporttyq saıystarǵa qatysýyna múmkindik berip, talapkerlerdiń osy dinı oqý ornyn tańdaýyna keńirek jol ashary anyq.
Aýdan ákimi men naıb múftı saltanatty túrde lentasyn qıǵan sport keshenine «MAKO Salavat» aty berildi. Alǵa aýdanyndaǵy saltanatty shara sporttyq oıyndarǵa ulasyp, 500 adamǵa as berildi. Sondaı-aq, dastarhan basynda QMDB bólim meńgerýshisi Sansybaı qajy Qurbanuly, Altynbek Utyshan jáne Tólebı Ospan, Ábdimútáli Dáýrenbekovter Táýelsizdigimizdi baǵalaý, medrese qyzmetiniń mańyzdylyǵy, saýapty istiń janynan tabylý syndy taqyryptarda úgit-nasıhat aıtyp, shara sońynda Salavat Kelbatyrulynyń rýhyna quran baǵyshtaldy.
