«Áljan ana» meshitinde qaıyrymdylyq semınary ótti (FOTO+VIDEO)

Búgin Nur-Sultan qalasyndaǵy «Áljan ana» meshitinde «Meıirimdilik mekeni» atty qaıyrymdylyq semınary bolyp ótti. Elorda meshitteri arasynda jaqynda bastaý alǵan bul ıgi semınardyń alǵashqy bóliminde qatysýshylarǵa túrli nasıhattar aıtylyp, tipti úıde otyryp tabys tabýdyń tásilderi úıretildi.

Aıtýly sharaǵa Nur-Sultan ókildigi atynan «Áziret Sultan» meshitiniń naıb ımamy Jumanazar Sadyrhanuly, «Qazaq English» ortalyǵynyń dırektory Ernat Melsuly, «Rýhanı Jastar» qanatynyń jetekshisi Mahambet Iskanderov jáne tátti ónimder jasaý kásibimen aınalysyp júrgen Dana Qaıyrǵalıqyzy qatysyp, jınalǵan jurtshylyqqa asyl dinimizde adal eńbek etip, tabys tabýdyń mańyzdylyǵy jaıynda nasıhattar men paıdaly keńester aıtty. Igi sharaǵa muryndyq bolǵan «Áljan ana» meshitiniń Bas ımamy Ádilhan Imanáliulyna ókildik atynan alǵys bildirildi.

Semınar aıasynda qatysýshylarǵa «Qazaq English» ortalyǵynyń dırektory Ernat Melsuly til bilý álemniń kilti ekendigin erekshe atap, qatysqan jamaǵatqa aǵylshyn tilin tegin úıretetindigin jetkizdi. Sondaı-aq, semınar barysynda búginde bes balasyn baǵyp úıde otyrsa da, ońtaıly jumys kózin taýyp, kásippen aınalysyp júrgen Dana Qaıyrǵalıqyzy shaqyrylyp, tort pisirip tabysqa jetken tájirıbesimen bólisti.

Semınardyń kelesi bóliminde qatysýshy 90 otbasyǵa «Áljan ana» meshitiniń uıymdastyrýymen azyq-túlik qory úlestirildi. 

Kóktemmen birge kóńilderge jyly shýaq syılaǵan semınar sońynda meshit ataýy berilgen Áljan Buqarbaıqyzynyń dúnıeden ozǵan kúnine oraı as berilip, marqumnyń rýhyna Quran baǵyshtaldy. 300-ge jýyq jannyń basyn qosqan aq dastarhanynan semınarǵa qatysýshylar men meshit jamaǵaty, medrese shákirtteri men Elorda meshitteriniń qyzmetkerleri dám tatyp, jamaǵatpen birge duǵa jasady.

Sýretterdi «FOTOGALEREIa» aıdarynan kóre alasyzdar!