«Áljan ana» meshitinde Máýlit merekesi toılandy (FOTO)

Ardaqty Muhammed (s.ǵ.s.) paıǵambarymyz dúnıege kelgen aıdyń qurmetine oraı elimizdegi barlyq qulshylyq ordalarynda Máýlit merekesi toılanyp, eki dúnıeniń sardarynyń parasaty pash etilip keledi.

Elimizdiń Bas shaharyndaǵy qulshylyq ordalary da osy ıgi dástúrdiń jyl sanap aıasyn keńeıtip, Máýlit merekesin dáripteýdiń túrli joldaryn kórsetip keledi. Sondaı salıqaly Máýlit keshi keshe Nur-Sultan qalasyndaǵy «Áljan ana» meshitinde bolyp ótti. Sharaǵa «Áziret Sultan» meshitiniń ájeleri arnaıy qatysyp, ózderiniń tileýlestigin tanytty.

Meshittegi merekege elimizge belgili qarı Jumanazar Sadyrhanov pen ónerpaz Arman Ǵabdýllın shaqyrylyp, jamaǵatqa máýlit jyryn oqyp berdi. Meshit bas ımamy Ádilhan Imanáliuly múbárak merekeniń mán-mańyzy jaıly nasıhat aıtyp, Alla elshisin (s.ǵ.s.) janyńnan artyq kórý – súnnetin súıip, ósıetin oryndaýdan bastalatynyn jetkizdi.

Áz Elshige (s.ǵ.s.) sansyz salaýattar joldanǵan merekelik sharanyń sońy arnaıy jaıylǵan aq dastarhanǵa ulasty. Merekelik ústel ústindegi sharaǵa elimizge belgili ánshiler de qatysyp, jamaǵatqa kóterińki kóńil-kúı syılaýǵa tyrysty.

Sýretterdi «FOTOGALEREIa» aıdarynan kóre alasyzdar!