«Altyn adam» Ankarada ótetin kórmege qoıylady (FOTO)
Túrkııa Respýblıkasynyń astanasy Ankara qalasynda ótetin kórmege «Altyn adam» qoıylady, dep habarlaıdy QazAqparat QR Ulttyq mýzeıi baspasóz bólimine silteme jasap.
«QR Ulttyq mýzeıi 12 qyrkúıekte Ankara qalasyndaǵy Anatolıı órkenıetteri mýzeıinde «Uly Dala: tarıh jáne mádenıet» kórmesin ashady. Kórme «Altyn adamnyń álem mýzeılerine sherýi» halyqaralyq kórme jobasy aıasynda 12 qyrkúıekten 12 qazanǵa deıin jalǵasady. Kórmeniń maqsaty – Qazaqstannyń tarıhı-mádenı baı murasymen sheteldik kórermendi tanystyrý. Kórmege Qazaqstan Respýblıkasynyń sımvoly sanalatyn «Altyn adam» qoıylady», delingen habarlamada.
1960-jyldardyń sońy men 1970-jyldardyń basynda Almatynyń mańaıynda tanymal arheolog Kemal Aqyshev zerttep júrgen Esik qorǵanynan, saq patshasy – «Altyn adamnyń» súıegi tabylǵan arheologııalyq sensatsııa oryn aldy. Baǵa jetpes oljaǵa «Qazaq Týtanhamony» degen at berilip, «ǵasyr jańalyǵy» dep tanyldy. Ejelgi dala bıleýshisiniń tájindegi qanatty altyn pyraq áshekeıleri Qazaqstan Respýblıkasy Eltańbasynyń bólshegine aınaldy, al Altyn adamnyń músini Almatydaǵy Táýelsizdik alańyna ornatylǵan.
Jarty ǵasyrǵa jýyq ýaqyt ótkennen keıin Qazaqstan Respýblıkasy Ulttyq mýzeıi halyqaralyq «Altyn adamnyń álem mýzeılerine sherýi» jobasyn jarııalady. Aýqymdy shara sheńberinde Belarýs, Reseı, Ázerbaıjan, Qytaı, Polsha jáne Ońtústik Koreıa, Ózbekstan, Makedonııa mýzeılerinde kórmeler úlken jetistikpen ótti. Kórme 2019 jyldyń sońyna deıin jer sharynyń taǵy da eki eline baratyn bolady.
Soltústik Ankara órkenıetteri mýzeıindegi kórmeden kıimi altyn japsyrmaly jáne jebe, qar barysy, arqar, jylqy jáne qus túrindegi altyn tilimsheler áshekeılep turǵan konýs pishindi erekshe bas kıimdi Altyn adamnyń rekonstrýktsııasyn jáne osy jas aq súıek saq jaýyngerimen (arheologtardyń pikirleri boıynsha 17-18 jastar shamasynda) birge jerlengen erte temir ǵasyrynyń (b.d.d V-IV ǵǵ.) arheologııalyq oljalarynyń kollektsııasyn tamashalaýǵa bolady.
