Almatynyń 10 meshitinde qysqy lager uıymdastyryldy

Almaty qalasynyń «Áıel-qyzdar» sektorynyń uıymdastyrýymen «Berekeli demalys» atty 10 meshitte mektep oqýshylaryna arnalǵan qysqy lager uıymdastyryldy.

Maqsaty – oqýshylardyń demalysyn paıdaly ótkizip, Allanyń sózi – Qurandy úıretip, Paıǵambarlardyń ómirimen tanystyrý.

«Qysqy lagerge 150-ge jýyq oqýshylar qatysyp, jaqsy nátıje kórsetti. Bul jerde ustazdyń da, shákirttiń de, ata-ananyń da eńbegi zor. Ustaz ben ata-ananyń maqsaty bir bolǵanda ǵana jaqsy nátıjelerge qol jetkizýge bolady. Búldirshinderdiń bilimge degen qushtarlyǵy, izdenisi bizdi tánti etti» deıdi uıymdastyrýshylar.

Balaqaılar aldyn-ala ózderine berilgen «Isra», «Náml», «Náhl», «Marııam», «Ǵankabýt», «Káhf», «Baqara», «Iýsýf», «Iýnýs» jáne t.b. súreler jaıynda izdenip, oqyp-bilip, sol oqıǵalarǵa sáıkes pisirgen táttilerin bezendirip, ádemi prezentatsııalar jasady.

– Shetinen ónerli qyzdarymyzdy kórip, úmbetimizdiń bolashaǵy jarqyn ekendigine kóz jetkizdik. Úıine qaıtyp bara jatqan qyzy men anasynyń sózin estip, «júregimen meshitke baılaný» degen – osy eken ǵoı degen oı túıdik.

Anasynyń: «qalaı, endi meshitke kelip turasyń ba?» – degen suraǵyna qyzy:

«Árıne, endi qalmaımyn» – dep kúlimsiregen kúıde meshitten shyǵyp bara jatty, - deıdi «Áıel-qyzdar» sektorynyń Almaty qalasyndaǵy ókilderi.