Almatyda Qonaev atyndaǵy meshit ashyldy (FOTO)

Keshe Almaty qalasyndaǵy Alataý aýdanyna qarasty Aqbulaq shaǵynaýdanynda Dinmuhamed Ahmetuly Qonaev atyndaǵy meshittiń saltanatty ashylý rásimi bolyp ótti.  

Almaty qalasy Ortalyq meshitiniń Bas ımamy Erkinbek qarı Kerimbekulynyń Quran oqýymen bastalǵan saltanatty shar shymyldyǵyn QMDB tóraǵasynyń orynbasary, naıb múftı Alaý Ádilbaev ashyp,  Almaty jurtshylyǵyn jańa meshittiń ashylýymen quttyqtady. Eli úshin aıanbaı qyzmet etken Dinmuhamed Qonaev atamyzdyń atyn ardaqtap, esimin meshitke berip jatqan azamattarǵa rızalyq sezimin bildirdi. 

Naıb múftı Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz hazrettiń atynan meshittiń boı kóterýine uıytqy bolǵan Ábenov Dáýlet Toǵaıulyna jáne Halıbek Zeınollaulyna Alǵys hat tabystap, shapan japty. 

Qulshylyq ordasynyń ashylý saltanatyna arnaıy shaqyrylǵan Dinmuhamed atamyzben qyzmettes bolǵan Keńes Aýqadıev el ardaqtysy týraly syr shertti. Al, Dinmuhamed atamyzdyń qaryndasy Roza Ahmetqyzy júrek tolqytar sóz sóılep, jınalǵan elge úlken alǵysyn aıtty.

Almaty qalasynyń din isteri jónindegi basqarma basshysy Aıdar Esenbekov Almaty qalasyna kórik berip turǵan meshitke qutty bolsyn aıtyp, jastar tárbıesinde osyndaı ımandylyq úıleriniń kóptep salyna berýine tilektestik bildirdi. 

Sońynan shashý shashylyp, jamaǵat eki bas namaz oqyp, quran baǵyshtaýǵa meshitke kirdi. El-jurt jańa meshitke Bas ımam bolyp taǵaıyndalǵan Kýlmýsakov Meıirjanǵa aldaǵy dinı qyzmetine sáttilik tilep, aqjoltaıyn aıtty.

2014 jyly qurylysy bastalǵan eki qabatty meshitte bir mezette eki jarym myńǵa jýyq adam namaz oqı alady. Meshittiń mıhraby shyǵys stılinde bezendirilip, ustyndary qazaqı oıýlarmen naqyshtalǵan. 

Meshit sýretterin «FOTOGALEREIa» aıdarynan kóre alasyzdar!