ALMATYDA «QMDB EXPO-2026» HALYQARALYQ KÓRMESI BASTALDY
Búgin Almaty qalasynda Qazaqstan musylmandary dinı basqarmasynyń uıymdastyrýymen «QMDB EXPO-2026» halyqaralyq kórmesi bastaldy. Kórmeniń resmı ashylýyna QMDB Tóraǵasy, Bas múftı Naýryzbaı qajy Taǵanuly arnaıy qatysty.
Bıyl jańa formatta uıymdastyrylǵan aýqymdy shara QMDB-nyń negizgi qyzmet baǵyttaryn, mekemeleri men jobalaryn, sondaı-aq otandyq jáne sheteldik halal ındýstrııa ókilderin bir alańǵa toǵystyryp otyr.
Kórmeniń ashylý saltanatynda sóz sóılegen Bas múftı Naýryzbaı qajy Taǵanuly:
«Bıyl kórmeniń aýqymyn keńeıtip, “QMDB EXPO-2026” ataýymen jańa formatta uıymdastyryp otyrmyz. Mundaǵy maqsatymyz – Dinı basqarmanyń san qyrly qyzmetin halyqqa keńinen tanystyryp, dinı-aǵartýshylyq, qaıyrymdylyq, aqparat, baspa, qajylyq, halal ındýstrııasy, ýaqyp, tsıfrlandyrý jáne áleýmettik baǵyttarda júzege asyp jatqan jumystardy bir alańda kórsetý. Sonymen qatar bul kórme otandyq jáne sheteldik kásipkerlerdiń tájirıbe almasýyna, jańa iskerlik baılanystar ornatýyna jáne halyqaralyq yntymaqtastyqty nyǵaıtýyna múmkindik beredi», – dedi.
Bıylǵy kórmege onǵa jýyq memlekettiń dıplomatııalyq ókilderi, elshiler men konsýldar qatysýda. Kórme alańynda júzge jýyq kompanııa óz ónimderi men qyzmetterin kópshilik nazaryna usynýda. Qatysýshylardyń basym bóligin otandyq kásiporyndar quraıdy.
Sonymen qatar Qyrǵyzstan, Ózbekstan, Túrkııa, Qytaı jáne Tájikstannan kelgen kompanııalar óz ónimderin tanystyrýda. Halal salasy boıynsha Qyrǵyzstan, Ózbekstan jáne Reseıden kelgen sala ókilderi de kórmege qatysyp, halal ındýstrııasyn damytý baǵytyndaǵy bastamalar aıasynda tájirıbe almasýda.
Aıta keteıik, «QMDB EXPO-2026» halyqaralyq kórmesi 19-20 qyrkúıek kúnderi Almaty qalasy, Tımırıazev kóshesi, 42 mekenjaıyndaǵy «Baqshasaraı» saltanat saraıynda ótedi.
