Almaty qalasynyń úzdik ımamdary anyqtaldy (FOTO)
«Eltanym» baıqaýy ımamdardyń bilim-biligin ǵana emes, ulttyq salt-dástúr, uly tulǵalardyń din jaıyndaǵy eńbekterin halyq arasynda nasıhattaý tásilderinde sarapqa salý úshin bıyl ekinshi ret uıymdastyryldy. Almaty qalasy Qoǵamdyq damý basqarmasy, «Úsh baılyq» qoǵamdyq birlestigi, Almaty Ortalyq meshitiniń uıymdastyrýymen úsh kezeńge bólingen baıqaýǵa qala meshitterinen 80 ımam qatysyp, irikteýge 24 úmitker ótti. Júzden júırik shyqqandar arasynan aqtyq synǵa ótken 8 ımam Nur-Múbarak Egıpet ıslam mádenıeti ýnıversıtetinde kópshilik aldynda synǵa tústi.
Júlde qory 1 mln. teńge turatyn saıysta:
Bas júlde Naýryzbaı aýdany Qaraǵaıly meshitiniń naıb ımamy Temirbek Pernebekuly – 300 000 (úsh júz myń) teńge;
1 oryn – Túrkisib meshitiniń naıb ımamy Mıras Kasımov 200 000 (eki júz myń) teńge;
2 oryn – Jomart Kersheev Alataý aýdany, ál-Azım meshitiniń naıb ımamy 150 000 (júz elý myń) teńge;
3 oryn – Áýezov aýdany, Aqsaı meshitiniń naıb ımamy Qýanysh Ábishev 100 000 (júz myń) teńge ıelendi.
Sondaı-aq arnaıy dıplom jáne 75 000 myń teńgeden 2 sertıfıkat, yntalandyrý 2 dıplom 50 myń teńge 2 sertıfıkat qatysýshylarǵa berildi.
Nur-Múbarak ýnıversıtetiniń prorektory, dotsent Qaırat Qurmanbaev: Imam – bul búgingi qoǵamda naǵyz úlgi, jan-jaqty kreatıvti, bilimdi de bilikti azamat qana emes, Qazaqstan memleketiniń damýyna tikeleı úles qosatyn tulǵa bolýy tıis. Mine, «Eltanym» sol ımam boıynda bolýy tıis qasıetter men qabiletterdi shyńdaıtyn birden-bir baıqaý,-dedi. Al «Úshbaılyq» qoǵamdyq birlestiginiń basshysy, qoǵam qaıratkeri Orazkúl Asanǵazy byltyrǵy báıgeden bıylǵy saıys deńgeıiniń áldeqaıda joǵary ótkenin aıtyp, ımamdardyń izdenimpazdyǵyna rızashylyǵyn bildirdi.
Jeńimpazdardy marapattaı kele, qazylar alqasynyń múshelerine Alǵys hat jarııalandy. Almaty qalasy Qoǵamdyq damý basqarmasy basshysynyń orynbasary Aıdar Esenbekov myrza men Almaty qalasynyń Bas ımamy Erkinbek Shoqaı myrzalar birlesip ótkizgen báıge óte joǵary deńgeıde áser qaldyrdy.
