Almaty qalasynyń ımamdary attestatsııadan ótýde (FOTO)
Búgin Qazaqstan musylmandary dinı basqarmasynyń qoldaýymen Almaty qalasy Ortalyq meshitinde Almaty qalasyna qarasty 50 meshittiń 230-ǵa tarta dinı qyzmetkeri (bas ımamdar, naıb ımamdar, moldalar, azanshylar) attestatsııadan ótip, synaq emtıhandaryn tapsyrdy.
Bes jylda bir ret ótetin bul attestasııanyń maqsaty – elimizdegi din salasynda qyzmet etip júrgen ımamdarynymyzdyń dinı biliktiligin arttyrý men dinı bilimderin úzdiksiz damytyp otyrýǵa jaǵdaı jasaý. Ári osy synaq emtıhany arqyly ımamdardyń óz-ózderin baǵalaýǵa, shyńdaýǵa múmkindik týdyrý.
Attestatsııada Qazaqstan musylmandary dinı basqaramasynyń naıb múftıi Alaý Ádilbaev tóraǵalyq etti. Sondaı-aq, pátýa bóliminiń meńgerýshisi Sansyzbaı Shoqan, Din isteri jáne saraptaý bóliminiń basshysy Nurbek Esmaǵanbetov, dinı basqarmanyń zańger mamany Saǵıtjan Dáýletııar jáne Almaty qalasy ókildiginiń bas ımamy Erkinbek Kerimbekuly attestatsııadan ótýshi ımamdardyń bilim deıgeılerin tekserip, baǵalady.
Attestatsııa 2 bólimnen turdy: birinshi bólimde ımamdar kompıýterlik baǵdarlama arqyly úsh baǵyt boıynsha (aqıda, fıqh, ákimshilik júıe) ázirlengen suraqtarǵa jaýap berse, al ekinshi bólimde QMDB tarapynan arnaıy bekitilgen sarapshy mamandar qoıǵan dinı saýaldar men Qazaqstan musylmandarynyń tuǵyrnamasy, bilim berýdi damytýdyń tujyrymdamasy boıynsha suraqtarǵa aýyzsha jaýap berip, Qurandy jatqa oqý synaǵynan ótti.
Óz kezeginde sóz alǵan naıb múftı bul bastamanyń tıimdi jaqtaryn aıtyp, attestatsııadan ótýshi dinı qyzmetkerlerge sáttilik tiledi.
Al, Din isteri jáne saraptaý bóliminiń meńgerýshisi Nurbek Esmaǵanbetov attestatsııanyń osymen ekinshi ret uıymdastyrylyp otyrǵanyn tilge tıek etti. Sonymen qatar, bıylǵy attestatsııanyń bir ereksheligi retinde, kompıýterlik baǵdarlamada arnaıy ázirlengen test suraqtarynynyń shekteýli ýaqyt aralyǵynda jaýap berýge shaqtap jasalǵanyn aıtty. Ári bul dinı saladaǵy ashyqtyqty bildiretinin jetkizdi.
Synaq tapsyrýshy din qyzmetkerlerine sáttilik tileımiz. Attestatsııa eki kúnge jalǵasady.
