Almaty óńirinde jańa kópir halyq ıgiligine berildi (FOTO)
Almaty oblysy, Almaty óńiri, Jambyl aýdany, Qarǵaly aýylynda QMDB-nyń 30 jyldyq mereı toıyna oraı Bas múftı Naýryzbaı qajy Taǵanulynyń «30 IGI ShARA» jobasy aıasynda jaıaý júrginshilerge arnalǵan jańa kópir halyq ıgiligine berildi.
Aıta keterligi, biraz jyldardan beri jıyrma bes myńǵa jýyq turǵyny bar Qarǵaly aýylynda Qarǵaly ózeninen ótý aýyl turǵyndary úshin qıynǵa soqqan. Kóptiń tilegi oryndalyp, kópirdiń paıdalanýǵa berilip otyrǵandyǵyna aýyl turǵyndary rızashylyqtaryn bildirdi.
Saltanatty sharaǵa arnaıy elordamyz Nur-Sultan qalasynan kelgen QMDB-nyń «Ýaqyp jáne qaıyrymdylyq» bóliminiń meńgerýshisi Kamaljan Turdybaev, Almaty óńiriniń bas ımamy Qýanysh Baqytbekuly, aýyl ımamdary men aqsaqaldary, ákimshilik qyzmetkerleri, meshit jamaǵattary qatysty. Qaıyrymdylyq is-sharada alǵy sóz alǵan Kamaljan Bekbosynuly jınalǵan musylman qaýymdy qasıetti juma kúnimen quttyqtap, meshit, kópir jáne jol salý amalynyń saýaby mol bolatyndyǵyn aıtyp, paıdalanýǵa berilgen jańa kópirge úlesin qosqan jomart azamattarǵa, meshit ımamdaryna alǵysyn jetkizdi. Jıyn sońynda jańa kópir lentasy qıylyp, aýyl aqsaqaldary aq tilek batasy berdi.
