Áleýmettiń áleýeti – mańyzdy másele – Serikbaı qajy Oraz
Halyqtyń áleýmettik máselesine nazar aýdarý memlekettik saıasattyń basym baǵytyna aınaldy. Ádilin aıtqanda, elimizde ár azamattyń turmys-tirshiligi men ıgiligi úshin tıisti baǵdarlamalar qabyldanyp, jumys júıeli júzege asýda.
Qazaqstan Prezıdenti Qasym-Jomart Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda halyqtyń áleýmettik máselesine basymdyq berdi. Jekelegen azamattardyń ótinish-tilekteri men talaptary mindetti túrde oryndalatynyn málimdedi.
Rasynda, halyqqa qyzmet etýden asqan ǵazız nárse joq. Jurttyń qarapaıym talap-tilegin oryndaý – kez kelgen salaǵa jaýapty tulǵanyń asyl boryshy. Ardaqty paıǵambarymyz Muhammed (oǵan Allanyń salaýaty men sálemi bolsyn): «Aralaryńda eń jaqsylaryń – aınalasyna paıdaly bolǵandaryń», – dep qoǵamǵa shýaǵyn shashyp, jaqsylyǵyn jaıyp júretin kópshil kisiniń mártebesin erekshe atap ótken.
Osyndaıda halyq danalyǵynda aıtylatyn:
«Jaman erdiń qaıǵysy,
Óz otynyń qasynda.
Jaqsy erdiń qaıǵysy,
Aýylynyń basynda», – degen oramdar oıǵa oralady...
Prezıdent qazaq halqynyń memleket quraýshy ult retindegi rólin bekemdep, Etnosaralyq tatýlyq pen dinaralyq túsinistikti qalyptastyra berý qajettigin atap ótti. Rasynda, bul – óte ózekti másele. Biz táýelsizdik jyldarynda qandaı asýdan asyp, nendeı belesti baǵyndyrsaq ta birligimizdiń arqasynda qol jetkizdik.
Qasym-Jomart Toqaev álem moıyndaǵan ǵulama ál-Farabıdiń 1150, hákim Abaıdyń 175 jyldyq mereıtoıyna oraı tulǵalarymyzdyń eńbekterin halyq arasynda dáripteýdi tapsyrdy. Bul bastamany elimizdegi din ǵalymdary men musylman qaýymy da úlken qýanyshpen qabyldady. Islam dininiń adamgershilik qundylyqtaryn nasıhattaýda ál-Farabı, Abaı, Shákárim, t.b. tulǵalarymyzdyń ómiri men óshpes murasy qundy qural bola alady.
Qazaqstan musylmandary dinı basqarmasy birneshe jyldan beri «Din men dástúr jyly» bastamasy aıasynda ýaǵyz-nasıhat jumystarynda qazaq halqynyń bı-sheshenderi men aqyn-jyraýlarynyń, ǵulama-ǵalymdarynyń ulaǵatty sózderin, taǵylymdy tujyrymdaryn nasıhattap keledi. Bul ıgi is árdaıym jalǵasyn taba bermek.
Memleket basshysy Joldaýda Ekonomıkalyq áleýetimizdi arttyrýmen qatar, bilim sapasyn kóterýge aıryqsha mán berdi.
Iá, bilim – baǵa jetpes qazyna. Ilimsiz órkenıet joq. Búginde kúsh pen qýat – bilimde. Ǵylymnan asqan qymbat dúnıe joq. Paıǵambarymyz Muhammed (oǵan Allanyń salaýaty men sálemi bolsyn): «Bilim men hıkmet musylmandardyń joǵaltqan qazynasy, qaı jerden tapsa da ıemdenip alsyn», – degen. Oqý oryndarynda oqyp júrgen ul-qyzdarymyz, baýyrlarymyz el-jurtqa paıda ákeler bilim izdense, álemniń eń ozyq tehnologııalaryn úırenip, ony ózgege úıretse – elge qosqan úlesi osy bolmaq.
Alla Taǵala memleketimizdiń bolashaǵyn baıandy etip, halyqtyń ál-aýqatyn kóterý jolyndaǵy ıgi isterimizge bereke bergeı! Ámın!
