Áleýmettik jelini ońtaıly paıdalaný jóninde semınar ótti (FOTO)

Búgin respýblıkalyq «Áziret Sultan» meshitinde Elorda ımamdaryna arnalǵan semınar-trenıng bolyp ótti. QMDB Astana qalasy ókildiginiń uıymdastyrýymen «Áleýmettik jeli: ádebi men áleýeti» taqyrybynda ótken semınar jumysyna Elordamyzdaǵy 10 meshit ımamdary men ustazdary, saıt qyzmetkerleri qatysyp, kóptegen qajetti derektermen tanysyp qaıtty.

Elýden astam din qyzmetkeriniń basy qosylǵan alqaly jıynǵa QMDB Baspasóz bóliminiń meńgerýshisi Aǵabek Qonarbaıuly, Astana qalasy Din problemalaryn zertteý ortalyǵynyń basshysy Japal Dolıev, Muslim.kz saıtynyń marketolog mamany Mahambet Eskendirovter shaqyrylyp, atalmysh taqyryp aıasyndaǵy arnaıy baıandamalar jasaldy. Semınar shymyldyǵyn ashqan «Áziret Sultan» meshitiniń birinshi naıb ımamy Qanat Qydyrmın búgingi tańda ǵalamtor betindegi belsendilikti arttyrýdyń qanshalyqty qajet ekenin atap ótip, búgingi sharanyń mańyzdylyǵyna toqtaldy. Otyrys tizginin qolǵa alǵan «Áziret Sultan» meshitiniń naıb ımamy Baqytjan Ótkelbaev budan soń qatysýshylarǵa arnaıy shaqyrylǵan baıandamashylardy tanystyryp, sharanyń tartymdy ótýine yqpal jasap otyrdy.

Áleýmettik jelini paıdalaný erejelerinen bastap, ádebi men áleýetin qosa túsindirgen mamandar keńesi – qatysýshylar úshin qajeti mol aqparat boldy. Tipti, arnaıy beınerolıkter men foto túsindirmeler kórsetilip, kópshilik kókeıindegi túrli suraqtarǵa jaýap qaıtaryldy. Din nasıhatyn ǵalamtor betinde de damytyp, jeli arqyly teris aǵymdarǵa tosqaýyl qoıý – qazirgi zaman talaby ekeni sózsiz. Osy sebepti de, búgingi ótken semınar-trenıng jumysy elimizdiń dinı ómirine jasalǵan úlken úles dese de bolǵandaı.

Semınar sońynda arnaıy shaqyrylǵan baıandamashylarǵa QMDB Astana qalasy ókildigi atynan «Alǵys hat» tabystalyp, semınar qatysýshylaryna sertıfıkat berildi.

Sýretterdi «FOTOGALEREIa» aıdarynan kóre alasyzdar!