«Ál-Ǵanı» meshitinde «Mektepke jol» aktsııasy ótti (FOTO+VIDEO)

Búgin, qasıetti juma kúni Nur-Sultan qalasyndaǵy qulshylyq ordalarynyń «Mektepke jol» qaıyrymdylyq aktsııasy bastaý aldy. Jańa oqý jyly qarsańyndaǵy qaıyrymdylyq sharasynyń alǵashqy kómegi «Ál-Ǵanı» meshitine ótinish bildirip, áleýmettik járdem alýǵa tirkelgen jamaǵatqa arnaldy. Meshit bas ımamy Baǵdat Abdýkarımovtyń aıtýynsha, qaıyrymdylyq aktsııasynyń sharapaty bul joly 40 otbasyǵa tıgen.

Juma namazynan soń arnaıy uıymdastyrylǵan qaıyrymdylyq sharasyna QMDB tóraǵasynyń birinshi orynbasary, naıb múftı Naýryzbaı qajy Taǵanuly ózi qatysyp, jańa oqý jylyna saqadaı-saı ázirlengen búldirshinderge izgi tilegin bildirip, aq batasyn arnady.. Meshitke kelip, qajetti qural-jabdyqtar toly mektep sómkesine qol jetkizip, qýanyshtary qoınyna syımaǵan oqýshylarǵa bilimniń qadir-qasıetin jetkizip, sabaqtaryn jaqsy oqýǵa shaqyrdy. Sondaı-aq, oqýshylardyń ata-analaryna mektep formasyna qajetti qarjylaı kómek te berildi.

Aıta keteıik, jyl saıyn dástúrli túrde ótkizilip kele jatqan «Mektepke jol» qaıyrymdylyq aktsııasy aldaǵy kúnderi Elorda meshitterinde birinen soń biri jalǵasy tabatyn bolmaq. jalpy jospar boıynsha, bas shahardaǵy qulshylyq ordalary bıylǵy jyly 1000-ǵa jýyq muqtaj otbasyǵa járdemin tıgizbek.

Sýretterdi «FOTOGALEREIa» aıdarynan kóre alasyzdar!