«ÁL-FARABI» MEShITI KENEN ÁZIRBAEVTYŃ 140 JYLDYǴYN ATAP ÓTTI (FOTO)

Búgin «Ábý Nasyr ál-Farabı» meshitinde halyq aqyny, sazger Kenen Ázirbaevtyń týǵanyna 140 jyl tolýyna oraı rýhanı jıyn ótti.

«Jaı kezde anaý deımiz, mynaý deımiz, Aýyrsaq, jan qysylsa Qudaı deımiz. Ómirge ákeletin, áketetin, Allanyń jazǵanyna ne etemiz», - dep jyrlaǵan aqyn Kenen Ázirbaevtyń aıtystary, jyr-dastandary, ańyz-áńgimeleri óz aldyna bir tóbe bolsa, ánderi men óleńderi óz aldy na mol dúnıe.

Izgi shara meshit jamaǵatyna saıyn dalamyzdyń uly tulǵalaryn, olardyń shyǵarmashylyǵyn, elge, dinge, tilge arnalǵan týyndylaryn keńinen tanystyrý maqsatynda ótkizildi. «Áziret Sultan» meshitiniń naıb ımamy, qarı Jumanazar Sadyrhanov rýhanı jıyndy qasıetti Quran aıattarymen bastap, ıisi qazaqtyń aqyndyq-jyrshylyq  dástúrin ulyqtaǵan án kemeńgeriniń rýhyna Quran baǵyshtady.

Urpaǵyna telegeı teńiz mol mura qaldyrǵan aqynnyń ómiri men shyǵarmashylyǵyna arnalǵan jıynǵa arnaıy kelgen L.N. Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory, qazaq ádebıetin zertteýshi Serik Negımov Kenen Ázirbaevtyń tulǵalyq beınesi men onyń eńbekteri jaıly arnaıy baıandama jasady. Aqynnyń jyrshylyq, sal-serilik ónerine ǵylymı turǵydan jan-jaqty sıpattama berdi.

Jıynǵa qatysýshy jamaǵat qazaq ǵulamasynyń kópshilikke beımálim tustarymen, shyǵarmalarymen tanysyp, ol jaıly tarıhı málimetterge qanyqty. Meshit jamaǵaty halyq aqynynyń urpaqtary, balasy Ázirbaev Baqytjan Kenenuly jáne nemerelerimen jaqynyraq tanysyp,  ardaqty áke týraly jyly estelikterine qanyq boldy.  Meshit ujymy aqyn urpaqtaryna jáne qonaqtarǵa estelik syı-sııapat tartý etti.

Derekkóz: ummet.kz