«ÁL-FARABI»: BALALARǴA TÁTTILER MEN AITTYQ SYILYQ ÚLESTIRILDI (FOTO)

Súnnetke saı amal etken meshit ujymy jyl saıynǵy ıgi úrdisti jalǵastyryp, aıt meıramyna ata-anasymen erip kelgen kishkentaı búldirshinderge aıttyq syılyq retinde táttiler tartý etti.

Aıt – qýanysh pen shattyqqa toly kún nemese «mereke», «meıram» degen uǵymdy bildiredi. Sahaba Ánastan (r.a.) jetken hadıste «Alla Elshisi (s.ǵ.s.) Mádınaǵa kelgende, olardyń eki merekesi bolatyn. Paıǵambarymyz (s.ǵ.s.): «Bul qandaı kúnder?», – dep suraǵanda: «qarańǵylyq dáýirinde ol kúnderdi oıyn-kúlkimen ótkizetin edik», – dedi.

Paıǵambarymyz (oǵan Allanyń ıgiligi men sálemi bolsyn): «Alla Taǵala osy eki kúndi olardan da jaqsy Qurban jáne Oraza aıt kúnderimen almastyrdy», – dedi (Násáı hadıster jınaǵy). Aıt kúnderi balalarǵa meıramdy sezindirý súnnet bolyp sanalady. Aıt barsha musylmandardyń merekesi bolǵandyqtan, ony eńbektegen baladan eńkeıgen shalǵa deıin sezinýi tıis.