«Adasýdan qutqarýshy» kitaby jaryqqa shyqty
Nur-Múbarak ýnıversıtetiniń Ábý Hanıfa atyndaǵy ǵylymı-zertteý ortalyǵy V-HI ǵasyrlardaǵy Islam álemindegi senimdik jáne fılosofııalyq baǵyttar jaıly málimet beretin «Adasýdan qutqarýshy (ál-mýnqız mın ád-dalal)» kitabyn jaryqqa shyǵardy.
Kitap avtory – ortaǵasyrlyq ǵulama, Islam tarıhyndaǵy eń yqpaldy oıshyldardyń biri Ábý Hamıd ál-Ǵazalı. Jan dúnıesindegi arpalysty óz qalamymen jetkizgen ál-Ǵazalıdyń avtobıografııalyq sıpaty bar kitabyn qazaq tiline tárjimalaǵan – Nur-Múbarak ýnıversıtetiniń oqytýshysy, doktorant Ernar Esimqulov. Batys pen Shyǵys áleminde erekshe qyzyǵýshylyq týdyrǵan bul eńbek buǵan deıin frantsýz, aǵylshyn, hındı, parsy t.b. tilderge aýdaryldy. Endi mine qazaq tilinde jaryq kórip otyr.
«Kitaptan ataqty ǵalymnyń aqıqatqa jetýdegi tabandylyǵyn ári ilimdi tyńǵylyqty zerttep baryp qana aıtqan tujyrymyn, musylman adamnyń boıynan tabylýy tıis parasattylyq pen danalyqtyń úlgisin kórýge bolady. Ortaǵasyrlyq ǵulamanyń ár sózi men tujyrymy qatpar-qatpar oı jıyntyǵy bolǵandyqtan aýdarýda qıyndyq týdyrǵany belgili. Soǵan qaramastan «Ǵazalıdiń oı álemin, aqıqat jolyndaǵy tabandylyǵyn, aqıqatty jalǵan kózqarastar men túsinikterden tazartýdaǵy yjdahatyn ózgelerdiń emes, óz qalamynan týǵan eńbekten tanýǵa, tanystyrýǵa degen yqylas bizdi osynaý qundy eńbekti aýdarýǵa ıtermeledi. Kitapty oqyǵan ár oqyrman, Ǵazalıden óz úlesin alady degen úmittemiz», – deıdi Ernar Esimqulov.
Jańa týyndynyń jaýapty redaktory – Nur-Múbarak ýnıversıtetiniń prorektory, PhD, dotsent Qaırat Qurmanbaev. Kitap Aqparat jáne qoǵamdyq damý mınıstrligi Din isteri komıteti tarapynan júrgizilgen dintaný saraptamasynyń oń qorytyndysyn alǵan. Kitapty oqyǵan ár oqyrman, orta ǵasyrda ómir súrse de Islam áleminde óshpes iz qaldyrǵan ǵulama Ǵazalıdiń suńǵyla oıymen tanysyp, aqıqatty tarazylaýda múmkindigi artady degen senim de mol.
