26 mıllıarderdiń dáýleti 3,8 mlrd kedeıdiń tabysymen teń túsedi

Álemdegi eń dáýletti 26 mıllıarderdiń baılyǵy 3,8 mıllıard kedeıdi qamtamasyz ete alady. Oxfam halyqaralyq birlestigi baıandamasynda osyndaı derekter jarııalandy, dep habarlaıdy Ansar.ru.

Uıym málimetinshe, 2018 jyly álem mıllıarderleri qazynasy 12%-ǵa artqan, al kedeılerdiń turmys deńgeıi  11%-ǵa tómendeı túsken. Bir jylda 2 200 mıllıarderdiń dáýleti 900 mlrd dollarǵa kóbeıgen. Oxfam esebi boıynsha 2017-2018 jyldary ár eki kúnde taǵy bir adam alǵashqy mıllıard tabysyna ıe bolǵan.

Jalpy baılyq kózi azdaǵan adamdardyń ıeliginde: 2017 jyly álemdegi barlyq kedeı adamdardyń tabysy 43 mıllıarderdiń dáýletine teń kelgen eken.

Oxfam ókilderi mysal retinde Amazon kompanııasynyń basshysy Djeff Bezosty alady. Ol – álemdegi eń baı adam. Onyń baılyǵynyń 1%-ynyń ózi Efıopııa memleketiniń densaýlyq salasy bıýdjetimen sáıkes keledi.

Sarapshylar osyndaı derekterge alańdaýshylyq bildirip, el úkimetterin tabys teńsizdigin qysqartý sharalaryn qabyldaýǵa shaqyrady. Bul rette dáýletti adamdarǵa salyqty kóterý usynylǵan. Máselen, álemdegi mıllıarderlerdiń tabys kóleminiń salyǵyn 1%-ǵa kóbeıtse, 262 mıllıon balany bilimmen qamtamasyz etýge múmkindik týady eken.