QMDB «Zeket» qorynyń qorytyndy jıyny ótti (FOTO)

QMDB-nyń «Zeket» qaıyrymdylyq qory óńirlerdegi ókildikterimen jınalys ótkizdi. Jınalysta QMDB naıb múftıi Ershat qajy Aǵybaıuly sóz bastap, «Zeket» qorynyń 2019 jyly atqarǵan jumystaryna joǵary baǵa berdi. Atap aıtsaq, 2019 jyly «Zeket» korporatıvtik qory 73 myńnan astam muqtaj otbasylarǵa qaıyrymdylyq kómek kórsetip, «El úlesi páterge» jobasy aıasynda 173 baspany kiltin tabystady.

2020 jyly Qazaqstan musylmandary dinı basqarmasyna 30 jyl tolýyna oraı, ári qara shańyraqtyń 30 jyldyǵyn nasıhattaýǵa baǵyttalǵan arnaıy qaıyrymdylyq is-sharalar «Zeket» qorynyń jyldyq josparyna engizildi. Osyǵan oraı, qor dırektory Talǵat qajy Seıtkárimuly ókilderge is-sharalarǵa baılanysty naqty tapsyrmalar berdi.

Sonymen qatar, bes paryzdyń biri, Allanyń buıryǵy zeketti nasıhattaý – óte mańyzdy ári jaýapty is. «Zeket» qory ókilderi 2020 jylǵa nasıhat josparymen tanysty. Atap aıtsaq, zeketke qatysty ýaǵyz-nasıhat jumystaryn kóbeıtý, beınejazbalar túsirip, áleýmettik jelilerde taratý, telearnalar men radıo kanaldaryna,  gazet-jýrnaldarǵa suhbattar berý jáne t.b. Sondaı-aq, qordyń basty prıntsıpteriniń biri ashyqtyq bolǵandyqtan, barynsha áleýmettik jeliler men basqa da resýrstar arqyly qor jumysyn kórsetý arqyly halyqtyń senimdiligin arttyrý.

Bekitilgen josparǵa saı óńirlerden jınalǵan «Zeket» qory ókilderine 2020 jyly bastaý alǵan jańa jobalar aıasynda jumys isteý tapsyryldy. Mysaly, «Bolashaqqa úmit syıla» atty jobanyń basty maqsaty men baǵdary – dinı jáne basqa da orta kásiptik jáne joǵary oqý oryndarynda oqyp jatqan muqtaj jetim balalarǵa oqý aqysymen kómek kórsetý, elimizdegi medreselerdi qoldaý.

Budan basqa ókilderdiń usynystary talqylanyp, Bas keńse tarapynan tapsyrmalar berilip, hattama boıynsha esepteri alynyp otyrady. Qaıyrymdylyq baǵytyndaǵy «El úlesi páterge», «Jylýlyq syıla», «Altyn qursaqty batyr anaǵa tosyn syı», «Úmit syıla sábıge» sııaqty aýqymdy jobalar ári qaraı óz jalǵasyn tabatyn bolady.