2019 jyly 80 meshit ashyldy (FOTO)

Bıyl elimiz boıynsha 80 meshit ashyldy. Bul týraly Qazaqstan musylmandary dinı basqarmasy Meshit isteri bóliminiń basshysy Marat Jappasbaev málimdedi.

«2019 jyly ashylǵan 80 meshittiń qurylys jumystary múftııat bekitken arnaıy ereje negizinde júzege asty. Jamaǵattyń ıgiligi úshin paıdalanýǵa berilgen meshittiń qujaty tıisti mekemelerge tirkelip, QMDB teńgerimine ótti. Búginde meshit salý kórsetkishi 0,67 paıyzǵa artty. Qazir respýblıka boıynsha, jalpy meshit sany – 2 691. Búginde jer-jerde 166 Alla úıi salynýda», dedi Marat Abdýllauly.

Aıta ketsek, Qazaqstan musylmandary dinı basqarmasy meshit salýdyń arnaıy erejesin bekitti. QMDB Ǵulamalar Keńesi bekitken qujat «Qazaqstan Respýblıkasynda tıptik jobadaǵy meshit ǵımaratyn salýdyń tártip erejesi» dep atalady. Bul – elimiz boıynsha tıptik jobadaǵy meshit ǵımaratyn salýdyń tártibin qalyptastyratyn negizgi qujat.

Ereje elimizdiń «Dinı qyzmet jáne dinı birlestikter týraly» zańyna, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» zańǵa, ózge de normatıvtik quqyqtyq aktilerge, sonymen qatar QMDB Jarǵysyna sáıkes ázirlendi.

Aıta keteıik, budan bylaı meshit ǵımaraty jergilikti jamaǵattyń sanyna oraı 3 deńgeıde salynady: aýyldyq (syıymdylyǵy – 70-500 adam), aýdandyq (syıymdylyǵy – 500-1500 adam), oblystyq, qalalyq (syıymdylyǵy – 1000-5000 adam).