15 stýdentke QMDB granty tabystaldy (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty qalasyna jasaǵan resmı sapary aıasynda «Nur-Múbárak» ýnıversıteti basshylyǵymen kezdesip, stýdentterge dáris oqydy.
Minberde alǵashqy sóz alǵan Bas múftı Naýryzbaı qajy Taǵanuly: «Qadirli stýdentter, inilerim men qaryndastarym! Búginde jastarymyzǵa tereń bilim, kórkem minez, myqty rýh, óz qadirin biletin bıik sana jáne eń bastysy tonnyń ishki baýyndaı tatýlyq kerek. Búgingi tańda kúsh te, qýat ta – bilim men birlikte. Ózderińiz bilesizder, biz bul baǵyttaǵy bastamamyzdy «Jeti rýhanı qazyq» tuǵyrnamasynda aıttyq. Qujatta jazylǵan qundylyqtar men adamgershilik qasıetter sizderdiń kúndelikti turmys-tirshilikterińizde kórinis tabýy tıis. Óıtkeni, din qyzmetkeri qoǵamdy tárbıeleýshi tulǵa. Allaǵa shúkir, Dinı basqarma memlekettiń qamqorlyǵyn sezinip keledi. Memleket basshysy, Prezıdentimiz Qasym-Jomart Toqaevpen, Tuńǵysh Prezıdent - Elbasy Nursultan Nazarbaevpen kezdesýde de memleket qamqorlyǵy sóz boldy. Osy oqý ornyna memlekettik oqý granttarynyń bólinýi úlken janashyrlyq dep bilemin.
Endeshe, osynda oqyp júrgen ul-qyzdarymyz, baýyrlarymyz el-jurtqa paıda keltiretin bilim izdense, jahannyń eń ozyq tehnologııalaryn úırense, ulttyq dástúr-saltymyzdy, ádebıetimizdi, mádenıetimizdi kókeıine toqyp alsa – táýelsizdikke qosqan úles osy bolmaq.
QMDB «Zeket» qorynyń dırektory Talǵat Omarovtyń úılestirýimen múftııattyń 30 jyldyq mereıtoıy aıasynda óz tobynan oza shapqan oqý ozattaryna, taǵdyrdyń jazýymen jetim qalǵan stýdentterge, kópbalaly otbasydan shyqqan shákirtterge grant taǵaıyndaýdy qolǵa aldyq. Bul grantqa osynda otyrǵan bárińiz ábden laıyqsyzdar dep esepteımin. Alla barshańyzǵa jar bolsyn!» degen izgi tilegin jetkizdi.
«Zeket» qorynyń dırektory Talǵat Omarovtyń aıtýynsha, tıisti komıssııa sheshimimen kópbalaly otbasydan shyqqan, jetim qalǵan, sondaı-aq úzdik oqıtyn 15 stýdenttiń oqý aqysy qor esebinen tólengen. Talǵat Seıitkárimuly bul baǵyttaǵy ıgi joba ózge de zaıyrly oqý oryndarynda jalǵasatynyn jetkizdi.
Aıta ketsek, jyl basynda Dinı basqarmaǵa 30 jyl tolýyna oraı 30 stýdentke oqý grantyn taǵaıyndaý josparlanǵan.
