ZINAǴA JAQYNDAMAŃDAR...

Zınaqorlyq- dinde  úlken kúná, qoǵamda qyp-qyzyl uıat, túptep kelgende zań júzinde de qylmys bolyp esepteledi. Zınanyń zardaby jasaǵan kisiniń tek qana ózine emes, otbasyna, urpaǵyna da zor bolary sózsiz. Sol sebepten de Allah taǵala bul jıirkenishti isten quldarynyń aýlaq bolýyn qasıetti Quran kárimde baıan etken:

وَلاَ تَقْرَبُواْ الزِّنَى إِنَّهُ كَانَ فَاحِشَةً وَسَاء سَبِيلاً

«Zınaǵa jaqyndamańdar. Rasynda ol – azǵyndyq jáne jaman jol».

Zınaqorlyq – múminniń sıpaty emes. Ony jasaǵan adam jazaǵa jolyǵady, qııamette de qatty azaptalady. Bul jaıynda Qudaı Taǵala qasıetti Quranda bylaı deıdi. 

وَالَّذِينَ لَا يَدْعُونَ مَعَ اللَّهِ إِلَهاً آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَلِكَ يَلْقَ أَثَاماً * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَاناً * إِلَّا مَن تَابَ وَآمَنَ وَعَمِلَ عَمَلاً صَالِحاً فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُوراً رَّحِيماً

«Olar (múminder) Allamen birge basqa qudaı shaqyrmaıdy, huqtary bolmasa Alla tyıymyna qarsy kisi óltirmeıdi ári zınaqorlyqqa da barmaıdy. Al kim solardy istese ol jazaǵa jolyǵady. Qııamet kúni oǵan degen azap eselene túsedi de, ol sonda qor bolǵan kúıde máńgilikke qalady. Alaıda kimde-kim táýbe qylyp, ıman keltirip jáne izgi is istese, mine solardyń jamandyqtaryn Alla jaqsylyqtarmen almastyrady. Shynynda da Alla óte keshirimdi ári asa rahymdy». 

Ókinishke oraı zamanymyzda, Batystyń bulyńǵyr saıasatyń saldarynan, bul sharıǵatymyzǵa qarsy keletin is jastarymyzdyń arasynda beleń alýda. Aıbarly uldarymyzben, monshaqty qyzdarymyzdyń emin erkin etene aralasýy zınaqorlyqtyń formaldyq turǵydan kórinýine sebep bolyp jatyr.  Oǵan qosa zınanyń saldarynan kókek analarmen, óz balasynyń ómirin qııýshylardyń sany artýda.  Árıne bul tek qana dinimizde emes, salt-dústúrimizde de quptalynbaıdy. Sózimizge dálel ata-babamyzdyń qyzdy qyryq úıden tyıǵany.

Osynshama bul kúnániń zardaptaryn aıta otyryp, Alla Taǵalanyń joǵaryda keltgen aıatta ne úshin «zına jasamańdar» dep emes, «zınaǵa (oǵan aparatyn joldarǵa) jolamańdar» dep buıyrǵanyn túsinýge bolady.

Ábý Hýraıradan (r.a.) jetken hadıste Paıǵambar (ﷺ) bylaı deıdi: «Pende zına jasaǵanda odan ıman shyǵyp ketedi de (onyń ústinde) shatyr sııaqty bolyp turady. Al odan (zınadan) ajyraǵanda, (ıaǵnı, múlde tyıylǵanda) oǵan ıman qaıtyp keledi».

Bul jaıynda mynadaı hadıster bar:

عَنْ أَبِي هُرَيْرَةَ رَضِيَ اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ:» لَا يَزْنِي الزَّانِي حِينَ يَزْنِي وَهُوَ مُؤْمِنٌ، وَلَا يَسْرِقُ السَّارِقُ حِينَ يَسْرِقُ وَهُوَ مُؤْمِنٌ، وَلَا يَشْرَبُ الْخَمْرَ حِينَ يَشْرَبُهَا وَهُوَ مُؤْمِنٌ«. رَوَاهُ الشَّيْخَانِ وَأَبُو دَاوُد وَالتِّرْمِذِيُّ وَالنَّسَائِيُّ.

Ábý Hýraıra (r.a.) jetkizgen hadıs-sharıfte Allanyń aqyrǵy Elshisi (ﷺ) bylaı deıdi: «Zınaqor zına jasaǵanda ımandy emes, urlyqshy urlyq istep jatqanda ımandy emes, araq ishýshi araq iship jatqan kezde ımandy emes». Násáı rıýaıatynda bul kúnálardy istegen musylman moınynan Islam dininiń jibin alyp tastaǵandaı bolatyny, eger kúnáni qaıtalamaıtyndaı bolyp shynaı táýbe jasasa ǵana Alla ony keshiretindigi jaıly aıtylady.

Alla Taǵala qashan bizdi bir isten tyısa ol nársede biz úshin zııan bar, tyıǵanynan bas tartsaq úlken jeńiskke jeterimiz anyq.  Alla taǵala elimizdiń jarqyn bolashaǵy úshin saýapty ister jasaýymyzdy bizge násip etsin!!!

Abýtálip Jasulan

«Yryskeldi qajy» meshitiniń naıb ımamy